Агар Қрим кўприги жиддий шикастланган бўлса, бу Россия ҳарбийларининг таъминот йўлларига сезиларли таъсир қилади. Америка урушни ўрганиш институти (ISW) таҳлилчиси Жорж Баррос тегишли фикрни илгари сурди.
.jpg)
“Россия фақат битта қуруқлик таъминоти линиясига, яъни босиб олинган Херсон ва Қримдаги ўн минглаб ҳарбийларини қўллаб-қувватлаш ёки эвакуация қилиш учун Азов денгизидаги қирғоқ магистралига эга бўлади”, — деди Баррос.
Нашрнинг таъкидлашича, воқеа тафсилотлари ҳалигача номаълум бўлса-да, баъзи россиялик сиёсатчилар портлашда Украина томонини айблашга шошилган. Жумладан, Россия Тергов қўмитаси баёнотида Украина “махсус хизматлари” ҳужум учун жавобгар экани айтилган, ҳатто ушбу факт бўйича жиноий иш қўзғатилган.
Нашр, шунингдек, босиб олинган Қрим энди Европага киритилмаётган россияликлар учун севимли дам олиш маскани эканини қайд этган. Байрам мавсумининг қизғин палласида Қрим кўприги ва унинг кириш жойларида доимий равишда катта тирбандликлар юзага келади.
Қрим кўпригида портлаш
17 июль тонгда Қрим кўпригида портлаш содир бўлди, оқибатда йўлнинг бир қисми сувга тушиб кетди. Портлаш оқибатида икки нафар россиялик ҳалок бўлган.
Баъзи ОАВ манбаларга таяниб, бу Украина хавфсизлик хизмати (УХХ) ва Украина ҳарбий-денгиз кучлари томонидан амалга оширилган махсус операция бўлганини хабар қилди, бироқ УХХ кўприкдаги ушбу ҳужум тафсилотларига аниқлик киритмади.
Кремль муносабати
Россия президентининг матбуот котиби Дмитрий Песков Россиянинг барча тегишли хизматлари ва идоралари Қрим кўпригидаги портлашдан сўнг эҳтимолий янги ҳужумларга тайёр эканини айтди. У “махсус ҳарбий операция”нинг мақсадлари орасида Қрим кўпригидаги портлашга жавоб ҳам бўлишини таъкидлади.
“Биз бу теракт сабаблари ва унинг ортида кимлар турганини биламиз. Бу биздан янада совуққонлик, қўшимча чора-тадбирлар ва қўшимча меҳнат талаб қилади”, — деди Песков.
Изоҳ (0)