Наманган вилоятининг Учқўрғон туманидаги Қайқи қишлоғида ёз чилласида довучча тугадиган ўриклар етиштирилмоқда. Бу ҳақда “Дарё” мухбири Азизбек Абдувалиев хабар бермоқда.
Бундай ўрикка қишлоқнинг “Навбаҳор” маҳалласида яшовчи Араббой Ҳайитов хонадонида дуч келдик.
Фото: Жаҳонгир Акрамов
“Фарғоналик йигитлар саккиз йил аввал қишлоғимизга келиб, кечпишар олма, ўрик, шафтоли ва нок кўчатларини бериб кетишганди. Биз ҳам харид қилдик. Бу кўчатлардан айниқса ўрик яхши авж олиб кетди. Унинг навини аниқ билмайман, кимдир ‘Довон ўриги’, кимдир яна бошқа ном билан атайди”, — дейди Араббой ака.
Араббой Ҳайитов
Фото: Жаҳонгир Акрамов
Бу ўрик ҳам бошқа навлар каби баҳорда гуллайди. Ёзда довучча тугиб, кузда, октябрь ойининг ўрталарига бориб пишиб, етилади.
“Ўригимиз ҳашаротларга чидамли, шира тушмайди. Энг асосийси, жуда ҳосилдор, таъми ҳам ажойиб. Кузда йўлингиз Наманганга, Қайқига тушадиган бўлса, хонадонимизга келинг, ўрикхўрлик қиламиз”, — дейди Араббой ака.
Хонадон соҳибининг айтишича, ўрикнинг бу навига талабгорлар ортиб бормоқда. Улардан бири кечпишар ўрик шохларидан қаламча олиб, боғидаги мингга яқин кўчатга улаш истагини билдирган.
Изоҳ (0)