Ўзбекистонда раҳбарлар фаолияти самарадорлигини баҳоловчи автоматлаштирилган ахборот тизими ишга туширилди

Ўзбекистонда раҳбарлар фаолияти самарадорлигини баҳоловчи автоматлаштирилган ахборот тизими ишга туширилди. Бу ҳақда Давлат хизматини ривожлантириш агентлиги ахборот хизмати раҳбари Севара Зокирова маълум қилди.

Қайд этилишича, samaradorlik.uz ахборот тизими айни пайтда синов тариқасида ишга туширилди.

Шунингдек, “Давлат фуқаролик хизмати соҳасида инсон ресурсларини бошқариш” hrm.argos.uz ахборот тизими жорий этилди. Маҳаллалардаги ҳоким ёрдамчилари, ёшлар етакчилари ва хотин-қизлар фаоллари орасидан юқори натижаларга эришган номзодларни танлаб олиш бўйича zaxira.argos.uz манзилида махсус платформа ишлаб чиқилди.

Давлат хизматчиларининг ҳуқуқларини ҳимоя қилиш ва улар учун шарт-шароитлар яратиш масаласида 8 та комплекс ўрганиш ва 558 та мониторинг ўтказилди.

Ўрганиш натижалари бўйича 3828 та қонунбузилишлари аниқланиб, 492 та тақдимнома, 475 та огоҳлантириш хатлари киритилди ҳамда 31 нафар айбдор шахсларни маъмурий жавобгарликка тортиш юзасидан ваколатли органларга таклифлар берилди.

Кўрилган чоралар натижасида 430 нафар ходимларнинг меҳнатига ҳақ тўлашга оид бузилган ҳуқуқлари тикланди, 66 та ноқонуний буйруқлар (ишга қабул қилиш тўғрисидаги) бекор қилинди, 24 нафар айбдор шахслар маъмурий жаримага тортилди, қонунбузилиш ҳолатлари сабаб 51 та танлов жараёнлари тўхтатилди.