Ўзбекистоннинг Қоҳирадаги элчихонасида Мисрнинг АCDIМА Group холдинг компанияси президенти Улфат Ғураб билан учрашув ўтказилди, деб хабар бермоқда “Дунё” АА.
Ўзбекистоннинг Қоҳирадаги элчихонаси маълумотига кўра, ушбу компания вакиллари март ойидан буён Ўзбекистонга бир неча бор сафар уюштирган ҳолда қўшма лойиҳалар ишлаб чиқиш ва амалга ошириш, ушбу лойиҳаларга Миср сармояларини киритиш бўйича музокаралар олиб борди.
АCDIМА Group компанияси дастлабки босқичда Мисрда ишлаб чиқарилган дори воситаларини Ўзбекистон бозорига олиб киришни, яқин келажакда эса дори-дармонларни маҳаллийлаштириш ва ишлаб чиқаришни йўлга қўйиш, уларни қўшни давлатларга экспорт қилиш, ушбу жараёнларга замонавий технологияларни жалб қилиш ҳамда мутахассислар тайёрлашни мўлжалламоқда.
Амалий сафар натижадорлигини ошириш ва Ўзбекистон томони билан аниқ келишувларга эришиш мақсадида делегацияга АCDIМА Group компанияси таркибидаги турли тузилмалар раҳбарлари киритилган.
Маълум қилинишича, АCDIМА Group компанияси 1976 йилда ташкил топган. Фармацевтика маҳсулотлари ва дори-дармонлар ишлаб чиқарувчи бир неча компанияларни ўз ичига олган Мисрнинг етакчи йирик холдингларидан бири ҳисобланади. Мисрда 18 та ишлаб чиқариш корхонасига эга бўлган ушбу компания дунёнинг 50 дан зиёд мамлакатида бизнес юритиш ишларини йўлга қўйган.
Изоҳ (0)