Ўзбекистонда 2023 йилнинг биринчи ярмида ёқилғи-энергетика соҳасида ўтказилган рейдларда 327 миллиард сўм зарар ундирилди. Бу ҳақда бош прокурор Ниғматилла Йўлдошев раҳбарлигида прокуратура органлари иштирокида ўтказилган йиғилишда маълум қилинди.
Таъкидланишича, прокуратура органлари томонидан ўтган ярим йилда аниқланган қонун бузилиш ҳолатлари 91 мингдан ортиқ назорат ҳужжатларини қўллаш орқали бартараф этилган, 225 минг нафар фуқаро бузилган ҳуқуқлари тикланган. Прокурор текширишлари ва дастлабки тергов давомида айбдор шахслардан фуқароларга ва давлат манфаатларига етказилган 1,3 триллион сўмлик зарар ундирилиши таъминланган.
Назорат фаолияти билан биргаликда бевосита прокурорлар саъй-ҳаракати билан қисқа муддатда 120 мингдан ортиқ эҳтиёжманд оилага ҳар томонлама кўмак берилган, қарийб 157 минг нафар ишсиз фуқаронинг бандлиги таъминланган. Тадбиркорлик субъектларини ҳар томонлама қўллаб-қувватлашга оид чоралар доирасида 19 316 нафар тадбиркорнинг бузилган ҳуқуқлари тикланган, қарийб 18 минг нафарининг муаммоларини бартараф этишда кўмаклашилган, натижада 12 469 та янги иш ўринлари яратилишига эришилган.
Бундан ташқари, прокурор назорати тадбирлари ўлароқ, давлат дастурларига киритилган 6 003 та объектни ўз муддатида фойдаланишга топширилиши, 1,4 триллион сўм маблағлар тежалиши, 27,5 миллиард сўмлик бюджет пуллари талон-торож қилиниши олди олиниши таъминланган.
Ёқилғи-энергетика соҳасида қонунийликни таъминлаш мақсадида ўтказилган 113 мингта рейд тадбирлари давомида 31 мингдан ортиқ ноқонуний ҳолатлар фош этилиб, 327 миллиард сўм зарар ундирилган.
Изоҳ (0)