Бухоро шаҳрида 22 туп қарағай ноқонуний кесилгани юзасидан жиноят иши қўзғатилди. Бу ҳақда Бош прокуратура матбуот хизмати хабар берди.
Маълум қилинишича, 2022 йил 1-октябрь куни Бухоро шаҳрининг Баҳоуддин Нақшбанд кўчасида “Bukhara G.C.” МЧЖ мансабдор шахслари ва бошқалар томонидан қимматбаҳо 22 туп қарағай ноқонуний кесилиб, табиатга 144,3 миллион сўмлик зиён етказилган.
Бироқ, мазкур қилмиш Бухоро вилояти экология, атроф-муҳитни муҳофаза қилиш ва иқлим ўзгариши бошқармаси мансабдор шахслари томонидан енгилроқ жазо назарда тутилган маъмурий ҳуқуқбузарлик сифатида расмийлаштирилган. Шунингдек, ноқонуний кесилган дарахтларларни олиб қўйиш ўрнига ҳуқуқбузарларнинг ўзига топшириб корхона томонидан шахсий манфаатларда ишлатиб юборилишига йўл қўйилган. Бундан ташқари, жамиятга янги дарахт экиб бериш мажбурияти юкланмаган.
Фуқароларнинг хабарига асосан ушбу қўпол қонунбузилиш ҳолати фош этилди. 2023 йил 12 июль куни Бухоро вилояти прокуратураси томонидан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) ва бошқа моддалар билан жиноят иши қўзғатилди.
Бош прокуратура томонидан мазкур жиноят иши тергови устидан назорат ўрнатилди.
Таҳлилларга кўра, 2017—2021 йилларда Бухоро шаҳрида амалга оширилган интенсив қурилиш ишлари давомида шаҳарнинг марказий қисми яшиллик даражаси 37 фоизга қисқарган бўлиб, ушбу ҳудуддаги назорат қилувчи давлат идоралари масъул мансабдор шахслари томонидан ўз хизмат вазифалари суъиистемол қилиниши атроф-муҳитга зарар етказилишига сабабчи бўлаётган омиллардан бири бўлиб қолмоқда.
Изоҳ (0)