O‘zbekistonda 2023-yilning birinchi yarmida yoqilg‘i-energetika sohasida o‘tkazilgan reydlarda 327 milliard so‘m zarar undirildi. Bu haqda bosh prokuror Nig‘matilla Yo‘ldoshyev rahbarligida prokuratura organlari ishtirokida o‘tkazilgan yig‘ilishda ma’lum qilindi.
Ta’kidlanishicha, prokuratura organlari tomonidan o‘tgan yarim yilda aniqlangan qonun buzilish holatlari 91 mingdan ortiq nazorat hujjatlarini qo‘llash orqali bartaraf etilgan, 225 ming nafar fuqaro buzilgan huquqlari tiklangan. Prokuror tekshirishlari va dastlabki tergov davomida aybdor shaxslardan fuqarolarga va davlat manfaatlariga yetkazilgan 1,3 trillion so‘mlik zarar undirilishi ta’minlangan.
Nazorat faoliyati bilan birgalikda bevosita prokurorlar sa’y-harakati bilan qisqa muddatda 120 mingdan ortiq ehtiyojmand oilaga har tomonlama ko‘mak berilgan, qariyb 157 ming nafar ishsiz fuqaroning bandligi ta’minlangan. Tadbirkorlik subyektlarini har tomonlama qo‘llab-quvvatlashga oid choralar doirasida 19 316 nafar tadbirkorning buzilgan huquqlari tiklangan, qariyb 18 ming nafarining muammolarini bartaraf etishda ko‘maklashilgan, natijada 12 469 ta yangi ish o‘rinlari yaratilishiga erishilgan.
Bundan tashqari, prokuror nazorati tadbirlari o‘laroq, davlat dasturlariga kiritilgan 6 003 ta obyektni o‘z muddatida foydalanishga topshirilishi, 1,4 trillion so‘m mablag‘lar tejalishi, 27,5 milliard so‘mlik budjet pullari talon-toroj qilinishi oldi olinishi ta’minlangan.
Yoqilg‘i-energetika sohasida qonuniylikni ta’minlash maqsadida o‘tkazilgan 113 mingta reyd tadbirlari davomida 31 mingdan ortiq noqonuniy holatlar fosh etilib, 327 milliard so‘m zarar undirilgan.
Izoh (0)