Тошкент каналларидаги сув сифати текширилди

Тошкентдаги каналлар ва унинг атрофидаги сув омборларидан ерусти сувларидан намуналар олиб, таҳлил қилинди, деб хабар беради “Ўзгидромет”.

Қайд этилишича, кимёвий ифлослантирувчи моддалар таркиби сувнинг ифлосланиш индекси (СИИ) бўйича ўрганилган.

• Бўзсув канали — (Телеминора ҳудуди) сув сифати III синф ўртача ифлосланган сувлар, СИИ — 1,15;
• Қорасув канали — (Фурқат боғи ҳудудида) сув сифати III синф ўртача ифлосланган сувлар, СИИ — 1,68;
• Салор канали — (Экопаркдан қуйида) сув сифати IV синф ифлосланган сувларга мос келади, СИИ — 2,88;
• Анҳор канали — (Кичик ҳалқа йўлидан қуйида) сув сифати II синф тоза сувлар, СИИ — 0,83;
• Бўрижар канали — (Magic City боғи ҳудуди) сув сифати III синф ўртача ифлосланган сувлар, СИИ — 1,05;
• Чорвоқ сув омбори – сув сифати II синф тоза сувлар, СИИ — 0,99;
• Туябўғиз сув омбори – сув сифати III синф ўртача ифлосланган сувлар, СИИ — 1,22.

Сув ифлосланиши индексидан (СИИ) — ерусти сувлари сифатини комплекс баҳолаш учун фойдаланилади. У нафақат сув сифатини турли сув объектларида солиштиришга, балки сув сифатини вақтинчалик ва фазовий динамикасини баҳолаш имконини беради.

Бундан олдин Бош прокуратура томонидан “Бўзсув оқова сув тозалаш” иншоотига келиб тушаётган оқова сувларнинг таркиби, уларнинг тозаланиши ҳамда Қуйи Бўзсув каналига қуйилишида амалдаги тартиб ва нормативларга риоя этилиши аҳволи Экология, атроф-муҳитни муҳофаза қилиш ва иқлим ўзгариши вазирлиги мутахассислари иштирокида ўрганилаётгани тўғрисида хабар берилганди.