Испания компанияси Самарқанд вилоятида қиймати 100 млн доллар бўлган оқава сув тозалаш иншоотини қуради.
Хабарга кўра, Ўзбекистон элчиси Жаҳонгир Ғаниев Испаниянинг Almar Water Solutions компанияси институционал алоқалар бўйича директори Луис Бланко ҳамда Маркетинг ва бизнесни ривожлантириш департаменти бошлиғи Мануэл Гарсиа Калвола билан музокаралар ўтказди.
Учрашувда Ўзбекистонга тўғридан тўғри хорижий инвестициялар ва илғор технологияларни жалб қилиш, оқава сув тозалаш иншоотларини тозалаш соҳасида тажриба алмашиш масалалари муҳокама қилинди. Испания вакиллари Ўзбекистонда оқава сув тозалаш иншоотларини қуриш ва модернизация қилиш йўналишида амалга оширилаётган лойиҳаларда ўз технологиялари ва сармоялари билан иштирок этишга катта қизиқиши борлигини билдирди.
Хориж томони маълумотига кўра, Almar Water Solutions компанияси вакиллари 1—2 март кунлари Тошкент шаҳрида бўлиб ўтган Ўзбекистон ва Испания Ҳукуматлараро комиссияси йиғилиши доирасида ташкил этилган бизнес-форумда иштирок этган. Компания Самарқанд вилояти ҳокимлиги билан Каттақўрғон шаҳрида қиймати 100 миллион АҚШ долларига тенг оқава сув тозалаш иншоотини ДXШ асосида қуриш ва бошқариш лойиҳасини амалга ошириш бўйича ҳамкорлик меморандумини имзолаган.
Ушбу лойиҳа доирасида испан компанияси дастлаб изланишларни бошлаш ва керакли ҳужжатларни ишлаб чиқиш мақсадида Ўзбекистоннинг тегишли ташкилотлари билан муҳокамаларни давом эттириш истагини қайд этди.
Бўлиб ўтган музокаралар натижасида томонлар амалга оширилиши кўзда тутилган лойиҳаларни жадаллаштириш мақсадида Ўзбекистон томонидан маъсул ташкилотлар вакиллари билан мулоқотларни ўтказиш масаласини ишлаб чиқишга келишиб олинди.
Ўзбекистонда сувни тежайдиган технологиялар
Апрель бошларида “Сув ресурсларидан фойдаланиш самарадорлигини ошириш бўйича кечиктириб бўлмайдиган чора-тадбирлар тўғрисида”ги президент қарори қабул қилинганди.
Қарорга кўра, 2023 йил 1 апрелдан қишлоқ хўжалиги маҳсулотларини етиштиришда сувни тежайдиган технологиялар жорий этишни давлат томонидан қўллаб-қувватлашнинг қуйидаги тартиби белгиланади:
- тижорат банклари кредитларининг гаров таъминоти 50 фоизгача, бироқ 2,5 миллиард сўмдан ортиқ бўлмаган миқдорда Тадбиркорлик фаолиятини қўллаб-қувватлаш давлат жамғармаси кафиллиги асосида таъминланади;
- тижорат банкларининг миллий валютада ажратиладиган, фоиз ставкаси Марказий банк асосий ставкасининг 1,5 бараваридан ошмаган кредитлари бўйича фоиз ставкасининг асосий ставкадан ошган, бироқ асосий ставканинг 30 фоизидан кўп бўлмаган қисмини қоплаш учун Жамғарма ҳисобидан компенсация тақдим этилади.
Шунингдек, Испания Ўзбекистоннинг узоқ аҳоли пунктларини тоза ичимлик суви билан таъминлаш лойиҳаларини амалга ошириши айтилган эди.
Изоҳ (0)