Ҳозирда ўзбекистонлик ёшларнинг аксарият қисми Қозоғистон, Қирғизистон ва Россияда таҳсил олмоқда. Бу ҳақда олий таълим, фан ва инновациялар вазирининг биринчи ўринбосари Комилжон Каримов “Дарё” мухбирига берган интервьюсида айтди.
Комилжон Каримовнинг таъкидлашича, хорижга чиқаётган ёшлар қайси олий таълим муассасаларига ўқишга кетаётгани бўйича аниқ статистика олиб борилмайди.
“Лекин тахминларимиз бор. Ҳозирда хорижда ўқиётган фуқароларимизнинг катта қисми Марказий Осиё давлатларидаги ОТМларда таҳсил оляпти. Аксарият талабалар Қозоғистон, Қирғизистон ва Россияда ўқияпти”, — деди вазир ўринбосари.
Комилжон Каримовнинг қўшимча қилишича, охирги йилларда Ўзбекистонда хусусий ОТМлар сони ортган. Уларнинг айримлари хориж ОТМларининг филиаллари ҳисобланади.
“Ҳозир республикада 65 та хусусий ОТМ фаолият юритяпти. Уларда 125 минг нафардан ортиқ талаба таҳсил оляпти. Охирги йилларда Ўзбекистондаги ОТМлар сони кўпайгани сари четга чиқиб ўқувчилар сони камаймоқда”, — деди вазирлик масъули.
Изоҳ (0)