“Қизимга уй ишларини қилгани учун ойлик тўлайман”. Райҳон Уласенова фарзанд тарбияси борасидаги тавсиялари билан ўртоқлашди

Актриса ва бошловчи Райҳон Уласенова “Қизил помада” кўрсатувига берган интервьюсида қизига ҳар ой уй ишларини қилаётгани учун ойлик тўлашини ва шу орқали унга моддий томонлама тарбия бераётгани ҳақида гапириб берди.

“Охирги уч-тўрт йил ичида қизим бирор марта пул сўрамаган”

— Мен ҳар ой қизимга пул тўлайман. Нима сабабдан бу ишни қилаётганимни сўрашингиз мумкин, аслида мен битта ўқ билан иккита қуённи ураман. Охирги уч-тўрт йил ичида қизим бирор марта пул сўрамаган. Яқинда ўзининг пулига iPhone 14 сотиб олди. Мен уни гўёки қилаётган ишлари учун рағбатлантиряпман-у, лекин қайсидир маънода ўзи пул ишлаб топяпти. Қизим ўз пулини авайлайди, ортиқча ишлатиб қўймайди ва ўзи олган нарсаси жуда ҳам қадрли бўлади. Масалан, Дубайда қулоқчинини йўқотиб қўйди, уни уч йил олдин ўзининг пулига сотиб олган эди. Кейин мен уни топишим керак, шунча пулга сотиб олганман, деди. Охири топдик.

“Ҳозирдан ўзи пул йиғиб, тақсимлашни, нимага ишлатишни ўрганади”

— Ёшлигимизда кичкина театр студиямиз бўларди, отам ишга бориб келганимиздан сўнг ҳаммага ойлик тўларди. Бу пулларни оиланики деб олиб қўймасди, ҳаммага ойлик тўларди. Контрактимизни ҳам ўзимиз тўлаганмиз, кийим-кечагимизни ҳам ўзимиз олганмиз. Кимдир у болангиз-ку, деб айтиши мумкин, аслида ҳеч ким ҳеч кимга ҳеч нарса қилишга мажбур эмас. Қайсидир маънода, у менинг ёрдамчим, ишларни қиляпти. Камроқ беряпман, лекин у ўзининг пули. Ҳозирдан ўзи пул йиғиб, тақсимлашни, нимага ишлатишни ўрганади. Нимадир олиши кераклигини айтади, пулинг етса, ол, дейман.