Ўзбек шоу-бизнесида санъатдан ташқари бошқа соҳада фаолият юритаётган ва шу соҳалардан даромад топаётган машҳурлар ҳам бор. Қуйида бошқа соҳада таҳсил олиб, санъатда машҳур бўлган ижодкорлар ҳақида маълумот берилади.
Музаффар Саъдуллаев
“Осмондаги болалар” фильмидаги Ҳамдам роли билан томошабинларнинг эътирофига сазовор бўлган Музаффар Саъдуллаев актёрлик соҳасида таҳсил олмаган. Ўз ролини маҳорат билан ижро этган актёр моҳир ҳунарманд ҳисобланади. У бир неча йил давомида Тошкентдаги “Чорсу” бозорида темирчилик сирларини ўрганган ва режиссёр Зулфиқор Мусоқов актёрни ўша ерда учратиб қолиб, “Осмондаги болалар” фильмида суратга тушишга таклиф қилган. Ҳозирда актёр фильмларда суратга тушишни ва тунукачилик билан шуғулланишни давом эттирмоқда. Музаффар Саъдуллаев бухгалтерия соҳаси бўйича дипломга ҳам эга.
Озод Шукруллаев
Стендап йўналиши ва вайнлари билан машҳурликка эришган Озод Шукруллаев Тошкент тиббиёт академиясида жарроҳлик соҳасида таҳсил олган. У ўша пайтлардан ойлик маоши етмагани сабабли ижодга кириб келган. Ҳозирда Озод Шукруллаев ижод билан шуғулланиш билан бирга Тошкентдаги хусусий клиникаларнинг бирида жарроҳ сифатида фаолият юритади.
Малика Раҳимова
Актриса Малика Раҳимова Тошкент марказий вокзалида нозир бўлиб ишлайди. Ҳозирда унинг саҳнадаги вазифаси ўз ролларини маҳорат билан ижро этиш, вокзалда эса йўловчиларнинг юкларини, ҳужжатларини текширишдан иборат. Малика Раҳимованинг турмуш ўртоғи ҳам темирйўл соҳасида фаолият юритади.
Суғдиёна Азимова
“Қайсаргинам”, “Нафрат” фильмлари, “Журналист” сериалидаги роллари билан томошабинларга яхши таниш бўлган актриса Суғдиёна Азимова маҳоратли стилист ҳисобланади. У санъат соҳасида таҳсил олмаган. Актриса 15 йилдан буён стилистлик билан шуғулланади.
Раъно Шодиева
Актриса Раъно Шодиева сурдопедагогика соҳасида таҳсил олган. У отасининг эшитиш билан боғлиқ муаммоси борлиги сабабли ёшлигидан сурдо тилини ўрганган. Имконияти чекланган инсонларга бефарқ бўлмаган Раъно Шодиева “Қўллар ёрдамида гаплашамиз” номли ташкилотга асос солди. У фаолияти давомида “Ўтов”, “Сароб”, “Ватан” ва бошқа кўплаб фильмларда суратга тушган.
Азиз Умрзоқов
“Дайди қизнинг дафтари” сериалидаги роли билан томошабинларга таниш бўлган Азиз Умрзоқов асли мутахассислиги бўйича актёр эмас. У Ўзбекистон Миллий университетининг Халқаро иқтисодий муносабатлар факультетида таҳсил олган. Санъаткор бўлишдан аввал эса солиқ соҳасида фаолият юритган.
Одина Тўхтасинова
“Сенсиз”, “Севги” ва “Шукрона” сериалларидаги роллари билан томошабинларга яхши таниш бўлган актриса Одина Тўхтасинова асли мутахассислиги бўйича ҳамшира. Аммо қондан қўрқиши сабаб бу соҳада ишлай олмаган ва хориж тилини ўрганишга қарор қилган.
— Ота-онам санъаткор бўлишимни исташмади, шу боис мактабни тамомлаб, ҳамширалик бўйича таҳсил олгандим. Аммо мутахассислигим бўйича фаолият юритолмадим. Коллежни тамомлагач, бир муддат касалхонада ишлаганман. Оғир аҳволдаги беморларни кўриб, руҳан қийналдим. Шундан сўнг тиббиёт соҳасида ишлолмаслигимни англаб етдим. Икки йил давомида хориж тилини ўргатувчи ўқув марказига қатнадим. Корейс тилини мукаммал ўрганиб, таржимонлик фаолиятимни бошладим. Аммо болаликдаги санъатга бўлган иштиёқим сўнмади. Кастингларда иштирок этиб турдим, — дейди актриса Одина Тўхтасинова.
Баҳром Назаров
Хонанда Баҳром Назаров темирйўл соҳасида фаолият юритган. У темирйўлчи бўлиш ниятида Тошкентга келади ва тақдир тақозоси билан Озодбек Назарбеков билан учрашади.
— Бошқа тенгдошларимга қараганда менга анча кеч омад кулиб боқди. Аммо бундан ўксинмайман. Чунки ҳамма нарса вақт-соати билан бўлади. 18 ёшимда Озодбек Назарбеков билан танишган бўлсам, 30 ёшимда қўшиғим орқали одамлар оғзига тушдим. 10 йил темирйўлда ишладим, — дейди Баҳром Назаров.
Унинг “Айрилдим”, “Юракcиз”, “Қарамадинг” ва бошқа бир қанча тароналари мухлислар томонидан севиб тингланади.
Изоҳ (0)