Омад неча ёшда кулиб боқишини олдиндан билиш қийин. Санъат вакиллари орасида ҳам бир неча йил давомида роллари омадли чиқишини кутиб яшаган ва 40 ёшдан кейин машҳурлик чўққисини забт этган ижодкорлар бисёр.
Убайдулло Омоннинг кинодан кетишига нима сабаб бўлган?
Ўзбекистон халқ артисти Убайдулло Омон кинодаги илк ролини 21 ёшида ижро этган. Яъни у 1969 йили режиссёр Анатолий Қобуловнинг “Баҳор ёмғирлари” фильмида бош қаҳрамон Самиғ ролини яратган. 1972 йили оилавий шароити сабаб, Бухорога қайтиб кетишига тўғри келади.
— “Ёш гвардия” театрида режиссёр бўлиб ишлаётганимда Тошкентдан икки хонали уй совға қилишганди. Икки қизим дунёга келиб, яхши ишлаб юрган пайтимизда Бухородан нохуш хабар келди. Қайнотам оламдан ўтиб қолганини айтишди. Дафн маросимлари ўтганидан кейин отам раҳматли “Келиннинг еттита ёш укаси қолди, уларнинг бири ногирон. Сен қайтиб қайнонангга қарашмасанг бўлмайди”, деган. Шу гапдан кейин Тошкентдаги карьерани якунлаб, Бухорога кўчиб ўтганмиз, — дейди актёр Убайдулло Омон.
У актёрликдан ташқари, бир неча йил театрда режиссёрлик ҳам қилган. Кинодаги 17 йиллик танаффусдан сўнг рус кино ижодкорлари томонидан суратга олинган “Ватанга қайтиш” фильмидаги роли билан фаолиятини қайта тиклаган. 2004 йили суратга олинган “Маржона” ва “Сарвиноз” каби фильмлардаги роллари уни ўзбек томошабинларига яқиндан таништирган. 2008 йили суратга олинган “Фарёд” фильмидаги соқов ота роли актёрни қайтадан кашф этди десак муболаға бўлмайди. У пайтда актёр 46 ёшни қаршилаган эди.
Азиза Бегматова салкам 40 йил кутилган рол...
Ўзбекистон халқ артисти Азиза Бегматова кинодаги фаолиятини 1989 йилда бошлаган. Аммо анча йилга қадар уни асосий ролларга таклиф этишмаган. Шу боисданми унга 43 ёшига қадар машҳурлик бахти насиб этмайди.
— Баҳодир Йўлдошевга 40 йилда онам билан учрашганим, унинг гапириши, феъл-атвори ҳақида гапириб берганман. У бир нечта саволларни берган. Кейин билсам у гапларимни эшитиб, хаёлан Чеча образини яратган экан. Бу рол менга насиб этди, бир неча йил давомида дублёрсиз уни ижро этдим. Ҳақиқатан ҳам спектакл кутилганидан ҳам кўпроқ машҳурликка эришди ва мени бутун Ўзбекистонга чеча сифатида танитди, —дейди актриса Азиза Бегматова.
Актриса бу йил 80 ёшни қаршилайди. “Чеча” спектаклидан сўнг унинг клип ва фильмларга ҳам худди ана шу образи учун таклиф этишган. Томошабинлар ҳам уни исми эмас, балки образи билан яхшироқ танишади.
Ёдгор Саъдиев: “Илк мукофотни 43 ёшимда олганман”
Ўзбекистон халқ артисти Ёдгор Саъдиев ҳам 50 ёшдан кейин машҳурликка эришган ижодкорлардан бири ҳисобланади. У кинодаги фаолиятини 1967 йилда “Дилбарим” фильмидаги роли билан бошлаган бўлишига қарамай, уни машҳур қилган рол Асадбек ҳисобланади.
— Ҳозирги ёшлар бирдан машҳур бўлиб кетгиси келади. Шахсан мен 43 ёшимда илк давлат мукофотини қўлга киритганман. Ўшанда раҳматли Ўзбекистон Республикасининг биринчи Президенти Ислом Каримовга биринчи мукофотим эканлигини айтганимда қулоғимга “Мен ҳам биринчи марта топширяпман”, деганди, — дейди актёр Ёдгор Саъдиев.
Актёр 1990 йилдан то 1998 йилга қадар бирорта фильмда суратга тушмаган. Бор эътиборини театрдаги фаолиятига қаратиб, қатор ролларни ижро этган. “Шайтанат” сериалидаги Асадбек эса унинг актёр сифатида машҳурликка эришишига сабаб бўлган.
Зулайҳо Бойҳоновага актрисаликда омад кулмади
Ўзбекистон халқ артисти Зулайҳо Бойҳонова хонандаликдан аввал театр актрисаси бўлган. Фильмларда ҳам катта-кичик ролларни ижро этган. Аммо ижодкор қўшиқчи сифатида анча кеч танилди. Устози Абдуҳошим Исмоилов билан ҳамкорликда яратган “Ҳай-ҳай” қўшиғи уни халққа яқинлаштирди.
Зулайҳо Бойҳонова санъатдаги фаолиятини 1986 йили бошлаган. Аммо унга машҳурлик бахти 2008 йилда насиб этди. “Ҳай-ҳай” қўшиғи яратилганида ижодкор 44 ёшда эди.
“‘Севгинатор’ орқали 66 ёшда танилдим”
Ўзбекистон халқ артисти Шафоат Раҳматуллаева ижоддаги фаолиятини 1965 йилда бошлаган. Шу кунгача Жиззах, Сирдарё ва Қўқон театрларида фаолият юритган. У кинодаги илк ролини “Масхарабоз” фильмида ижро этган.
Аммо актрисанинг халқ орасида танилишига “Севгинатор” фильми сабаб бўлган. Режиссёр Абдувоҳид Ғаниевнинг “Севгинатор” фильми суратга олинганида актриса 66 ёшда эди. Ижарачи аёл роли актрисага кутилмаган машҳурлик олиб келди.
Изоҳ (0)