Украина мудофаа вазири Алексей Резников НАТО саммити чоғида мамлакатга кассетали бомбалар етказиб берилиши рус қўшинларига қарши урушда ўйин қоидаларини ўзгартиришини айтди. Бу ҳақда Politico хабар берди.
Мудофаа вазирига кўра, кассетали бомбалар оддий артиллерия снарядлари тақчиллигини қоплаш учун зарур.
“2022 йил май ойида 155 миллиметрли артиллерия тизимларини олганимизда, у ўйин қоидасини ўзгартирганди. Июль ойида турли хил ўт очувчи реактив тизимларни қабул қилдик. Бу навбатдаги ўйин қоидасини ўзгартириш бўлган. Умид қиламанки, кассетали ўқ-дорилар вақтинча босиб олинган ҳудудларимизни озод қилиш учун ўйин қоидаларининг навбатдаги ўзгариши бўлади”, — дея таъкидлади Резников.
У баъзи давлатлар ва гуманитар гуруҳларнинг АҚШнинг Украинага кассетали бомбаларни топшириш ҳақидаги қарорига нисбатан норозилигини рад этди. Қуроллар фақат Украинанинг шаҳар атрофидаги ҳудудларида қўлланади. Бундан ташқари, иттифоқчилар кассетали қуроллардан фойдаланиш тўғрисида ҳам хабардор қилинади.
Украинага кассетали ўқ-дорилар берилиши
АҚШ Украинага кассетали ўқ-дорилар (ёки кассетали бомбалар) беради. У ўнлаб-юзлаб кичикроқ бомбаларни ўз ичига олган контейнерлардир. Уларни самолётдан, артиллериядан, ракета отиш мосламаларидан, денгиз қуролларидан отиш мумкин.
Кассетали ўқ-дорилар олдиндан белгиланган баландликда очилади, бу мўлжалланган нишоннинг майдонига боғлиқ бўлиб, ичидаги ўқ-дорилар белгиланган ҳудудга тақсимланади. Ўқ-дорилар бир-бирига таймер билан боғланган ва ерга яқинроқ портлайди.
Россиянинг Украинага кассетали бомбалар берилаётганига муносабати қандай?
Россия мудофаа вазирига кўра, Украинага кассетали ўқ-дорилар етказиб берилса, Россия қўшинлари Украина армиясига қарши худди шундай воситаларни қўллашга мажбур бўлади. У Америка раҳбариятининг бу қарори конфликтнинг чўзилишига таъсир қилишини таъкидлади.
Россия мудофаа вазири мамлакат “ҳар эҳтимолга қарши” кассетали бомбаларга эгалигини айтди.
Нима учун кассетали ўқ-дорилар баҳсга сабаб бўлмоқда?
Бомбалар катта майдонга тушгани сабабли улар жанговар бўлмаган ҳудудларга ҳам таҳдид солиши мумкин. Бундан ташқари, Халқаро Қизил Хоч қўмитаси маълумотларига кўра, ўқ-дориларнинг 10 фоиздан 40 фоизгача бўлган қисми нобуд бўлади ва портламаган ўқ-дорилар тинч аҳоли учун йиллар ва ҳатто ўнлаб йиллар давомида хавф туғдиради.
Потенсиал ҳалокатли кассетали ўқ-дорилар Лаос ва Вьетнамда ишлатилганидан 50 йил ўтиб ҳамон портламай қолмоқда, бу эса мазкур қуролларни кенг миқёсда тақиқлашни талаб қилишга ундади.
Кассетали ўқлар тўғрисидаги конвенция туфайли дунёнинг аксарият мамлакатлари ушбу қуроллардан фойдаланишни аллақачон тақиқлаб қўйган, бу эса уларни захиралаш, ишлаб чиқариш ва узатишни ҳам тақиқлайди. Ушбу конвенция га 123 давлат қўшилган, аммо яна 71 давлат (хусусан, АҚШ, Украина, Россия) қўшилмаган.
Изоҳ (0)