Давлат активларини бошқариш агентлиги “Давлат мулки объектлари билан савдо(танлов)ларни ўтказиш жараёнларининг очиқлиги ва шаффофлигини таъминлаш бўйича қўшимча чора-тадбирлари тўғрисида”ги ҳукумати қарори лойиҳасини муҳокамага қўйди.
Қарор билан давлат мулки объектлари билан савдо(танлов)ларни ўтказиш тўғрисидаги маълумотларни жойлаштириш порталига жойлаштириладиган ахборотлар рўйхати ва порталга интеграция қилинадиган вазирликлар, идоралар ва бошқа ташкилотлар рўйхати тасдиқланади.
Белгиланган вазирликлар, идоралар ва бошқа ташкилотлар порталга:
- давлат мулки объектлари ҳақидаги маълумотлар (объектнинг умумий тавсифи, савдо (танлов) ўтказиш механизми, шартлари, қиймати)ни эълон қилишнинг қонунчилик ҳужжатларида белгиланганидан кам бўлмаган муддатда, бироқ объект билан савдо (танлов) ўтказилишидан камида бир ҳафта олдин;
- давлат мулки объектларини савдо (танлов) натижалари тўғрисидаги ахборотларни (ғолиб (харидор, хусусий шерик) ҳақидаги маълумотлар, объектнинг реализация қиймати, олинган мажбуриятлар), савдо (танлов) натижаси эълон қилинган кундан сўнг, беш кун ичида жойлаштиради.
Шундай тартиб ўрнатиладики, порталга давлат мулки объектлари тўғрисидаги маълумотларни жойлаштирмасдан давлат мулки объектларини савдо(танлов)ларга чиқаришга ва тўғридан тўғри беришга йўл қўйилмайди.
Март охирларида “Давлат активларини бошқариш агентлиги фаолиятини самарали ташкил этиш чора-тадбирлари тўғрисида”ги президент қарори қабул қилинганди. Қарорга кўра, 2023 йил 1-октябргача “Давлат мулки объектлари билан савдоларни ўтказиш тўғрисидаги маълумотларни жойлаштириш портали” яратилади, унда барча давлат мулки объектларини савдога чиқариш ва унинг натижалари тўғрисидаги ахборотлар жойлаштирилади ҳамда ушбу тизим солиқ органларининг ахборот тизимига интеграция қилинади.
Изоҳ (0)