Самарқандда такси ҳайдовчиси болани итлар ҳамласидан қутқариб қолгани тўғрисида хабар берилганди. Telegram’даги “Экологуз” каналининг ёзишича, болага ташланган итларнинг эгаси уларни “итлар жанги”га тайёрлаб келган.
“Мазкур ит дайди эмас, уй итидир. Унинг эгаси ит уриштириш билан шуғулланади. Эгасини деб ит шунақа ваҳший бўп кетган. Уйида 7-8 талаб итлани жангга тайёрлаб юрадиган одам экан. Ҳайвонларни одамларнинг ўзи ваҳший қилиб тарбиялайди. Албатта, ана шундайлар касрига ҳозир яна Ўзбекистоннинг барча ҳудудларида бошпанасиз итларни қириш бошланади”, — деб ёзади канал муаллифи.
Шу билан бирга, канал муаллифи ушбу итларнинг эгасини Жиноят кодексининг 278-моддаси 1-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноий жавобгарликка тортиш кераклигини таъкидлаган.
Самарқанд шаҳридаги “Ёшлар” маҳалла фуқаролар йиғини ҳудудида жойлашган автотураргоҳ олдида кетаётган болага итлар ҳамла қилган, такси ҳайдовчиси уни қутқариб қолганди. Ҳолат 8 июль куни содир бўлган, бироқ видеотасвирлар куни кеча ижтимоий тармоқларда тарқалди. Қайд этилишича, ўша куниёқ болага тиббий-психологик ёрдам кўрсатилган ва айни пайтда унинг ҳолати яхши.
Самарқанд вилояти ИИБ ахборот хизмати раҳбарининг маълум қилишича, болага ташланган итларнинг эгасига нисбатан Маъмурий жавобгарлик тўғрисидаги кодекснинг 110-моддаси (ит ва мушук боқиш қоидаларини бузиш) билан маъмурий баённома расмийлаштирилган.
Изоҳ (0)