Тошкент вилояти ҳудудида фуқаро ИИБ ходимларига пичоқ ўқталгани тасвирланган видео тарқалганди. Тошкент вилояти Ички ишлар бош бошқармасининг мазкур воқеа юзасидан тушунтириш беришича, у ИИБ ходимига пичоқ ўқталишидан аввал 40 ёшли фуқаронинг қорин соҳасига пичоқ санчиб, унга тан жароҳати етказган.
Жорий йилнинг 7 июль куни Тошкент тумани ҳудуди “Ғишт кўприк” божхона пости олдида, Сирдарё вилоятида яшовчи 1965 йилда туғилган фуқаро ҳеч бир сабабсиз, йўл ёқасидан ҳаракатланиб кетаётган, ўзига бегона бўлган 40 ёшли фуқаронинг қорин қисмига, ёнида бўлган пичоқ билан тўсатдан зарба бериб, тан жароҳати етказган. Воқеа содир бўлган заҳоти, ҳудудда хизмат олиб бораётган Тошкент вилояти ИИББ ППХ ходимлари ушбу шахснинг олдига бориб, ундан зудлик билан ҳаракатларини тўхтатишни талаб қилганларида, фуқаро ходимларга ва атрофдаги бошқа фуқароларга ҳам қўлидаги пичоқ билан ташланиб, таҳдид қилади.
Шундан сўнг ходимлар атрофдаги бошқа фуқароларга ҳам шикаст етказишининг олдини олиш мақсадида, хизматда фойдаланиш учун бириктирилган махсус резина таёғини ишлатиб, жисмоний куч қўллаган ҳолда фуқаро Ш.Э.ни қўлга олишган ва зарарсизлантирилган. Жароҳатланган фуқаро ходимлар томонидан тезлик билан шифохонага олиб борилган, — дейилади бош бошқарма ахборот хизмати хабарида.
Қўшимча қилинишича, ҳолат юзасидан ушланган шахсга нисбатан Жиноят кодексининг 104-моддаси 2-қисми (қасддан баданга оғир шикаст етказиш) билан жиноят иши қўзғатилиб, тергов ҳаракатлари олиб борилмоқда. Гумонланувчи фуқаронинг руҳий ҳолати юзасидан психологик экспертиза тайинланган.
Изоҳ (0)