Туркия президенти Ражаб Тоййиб Эрдўғон Швециянинг НАТОга аъзо бўлиш ташаббусини қўллаб-қувватлашга рози бўлди. Бу ҳақда альянс раҳбари Йенс Столтенберг Вилнюсдаги НАТО саммити арафасида Туркия раҳбари, Швеция бош вазири Улф Кристерссон ва Европа кенгаши раҳбари Шарл Мишель билан музокаралар якунларида маълум қилди, деб ёзмоқда BBC News.
Twitter’даги саҳифасида Столтенберг Эрдўғон “Швециянинг НАТОга аъзо бўлишини ратификация қилувчи протоколни имкон қадар тезроқ парламентга юборишга ва унинг ратификация қилинишини таъминлашга рози бўлганини” ёзди. Туркия парламенти Швециянинг аризасини кузги сессияда маъқуллаши кутилмоқда.
“Бу НАТО иттифоқчиларининг барчасини кучлироқ ва хавфсизроқ қиладиган тарихий қадамдир”, — деди альянс бош котиби.
АҚШ президенти Жо Байден Эрдўғоннинг қарорини олқишлади.
Туркиянинг Anadolu давлат агентлиги ҳам мамлакат Швециянинг НАТОга аъзолиги ҳақидаги протоколларни кўриб чиқиш учун парламентга юборишини ва “уларни тасдиқлаш учун яқиндан ҳамкорлик қилиши”ни ёзди.
Ўз навбатида Стокгольм Анқаранинг Европа Иттифоқига қўшилиши ва виза режимини либераллаштириш жараёнини қўллаб-қувватлашга ваъда берди, шунингдек, Туркияда террорчи деб ҳисобланган ташкилотларга ёрдам бермаслигини тасдиқлади.
Швеция НАТОга, Туркия Европа Иттифоқига интилмоқда
Швеция 2022 йилнинг ёзида Финляндия билан биргаликда НАТОга аъзо бўлиш учун ариза топширган. Мамлакатлар Россия қўшинларининг Украинага кенг кўламли босқини фонида альянсга қўшилиш ҳақида қарор қабул қилган. НАТОга аъзо бўлиш учун номзод давлатнинг аризаси альянснинг барча аъзолари томонидан маъқулланиши керак.
Якунда фақат Финляндия 2023 йил апрель ойида НАТОга қўшилди. Туркия Швециянинг альянсга киришига бир қанча шартлар билан қарши чиқди. Хусусан, Анқара Стокгольмдан Туркия расмийлари террорчиликда айблаётган шахсларни экстрадиция қилишни, шунингдек, Туркия террорчи ташкилот деб ҳисоблаган Курдистон ишчилар партияси “фаолиятига йўл қўймасликни” талаб қилди.
10 июль куни Туркия президенти Ражаб Тоййиб Эрдўғон агар унинг мамлакати Европа Иттифоқига қабул қилинса, Швециянинг НАТОга аъзо бўлиш ҳақидаги аризасини кўриб чиқишни маъқуллашга тайёрлигини айтди.
Изоҳ (0)