Ўзбекистон президенти Шавкат Мирзиёев Россия президенти Владимир Путин билан телефон орқали мулоқот қилди. Бу ҳақда Президент матбуот хизмати хабар берди.
Россия етакчиси Ўзбекистон раҳбарини сайловда қозонилган ишончли ғалаба билан дилдан қутлади.
Алоҳида таъкидланишича, овоз бериш натижалари Ўзбекистонда мамлакатни янада жадал ривожлантириш, унинг халқаро нуфузини мустаҳкамлаш, фуқароларнинг ҳуқуқ ва манфаатларини ҳимоя қилиш йўлида амалга оширилаётган кенг кўламли ислоҳотлар сиёсати халқ томонидан кенг қўллаб-қувватланаётганини яна бир бор кўрсатган.
Суҳбат чоғида икки томонлама муносабатларнинг долзарб масалалари кўриб чиқилган.
“Етакчилар ўзаро манфаатли савдо-иқтисодий ҳамкорликни кенгайтириш, товар айирбошлаш суръатини давом эттириш ва саноат кооперацияси лойиҳаларини илгари суриш масалаларига алоҳида тўхталдилар”, — дейилади хабарда.
Давлат раҳбарлари ишбилармонлар ва ҳудудлар даражасидаги ҳамкорликни янада ривожлантириш, фаол гуманитар алмашинувни давом эттириш муҳимлигини кўрсатиб ўтган. Минтақавий кун тартибидаги долзарб масалалар юзасидан ҳам фикр алмашилган.
Муддатидан илгари бўлиб ўтган президентлик сайловининг дастлабки натижаларига кўра, амалдаги президент Шавкат Мирзиёев 87,05 фоиз овоз билан ғалаба қозонди. Шундан сўнг сайланган давлат раҳбари қўшни ҳамда ҳамкор давлатлар раҳбарларидан табрикларни қабул қила бошлади. Ҳозирга қадар Тожикистон, Озарбайжон, Туркия, Туркманистон, Қозоғистон президентлари, шунингдек, Туркманистон Миллий етакчиси, Халқ Маслаҳати раиси Гурбангули Бердимуҳамедов ҳам Шавкат Мирзиёевга ўз табрикларини йўллади.
Изоҳ (0)