Muddatidan ilgari bo‘lib o‘tgan prezidentlik saylovining dastlabki natijalariga ko‘ra, amaldagi prezident Shavkat Mirziyoyev 87,05 foiz ovoz bilan g‘alaba qozondi. Shundan so‘ng saylangan davlat rahbari qo‘shni hamda hamkor davlatlar rahbarlaridan tabriklarni qabul qila boshladi.
Xususan, Tojikiston prezidenti Emomali Rahmon ham Shavkat Mirziyoyevni saylovda qozongan ishonchli g‘alabasi bilan qutlab, u bilan ko‘p qirrali munosabatlarni, eng avvalo, savdo-iqtisodiyot, investitsiyalar, energetika, qishloq xo‘jaligi va boshqa ustuvor sohalarda amaliy hamkorlikni yanada kengaytirish masalalarini muhokama qildi.
Shavkat Mirziyoyevning Ozarbayjon prezidenti Ilhom Aliyev bilan ham telefon orqali muloqot qildi. Suhbatda ko‘p qirrali munosabatlarni yanada kengaytirish va qo‘shma loyihalarni ilgari surish masalalari muhokama etilgan. Ozarbayjon rahbari mamlakat yetakchisini saylovdagi ishonchli g‘alabasi bilan samimiy tabriklab, do‘st O‘zbekiston xalqiga tinchlik-osoyishtalik, farovonlik va ravnaq tiladi.
Turkiya prezidenti Rajab Toyyib Erdo‘g‘on bilan telefon orqali muloqotda oliy darajadagi Strategik hamkorlik kengashining bo‘lajak yig‘ilishiga birgalikda har tomonlama tayyorgarlik ko‘rish zarurligi haqida so‘z bordi. Suhbat avvalida Turkiya rahbari ishonchli g‘alaba bilan qutladi, saylovchilarning ovoz berishdagi faol ishtirokini hamda O‘zbekistonda amalga oshirilayotgan ishlar aholi tomonidan keng qo‘llab-quvvatlanganini taʼkidladi.
Turkmaniston prezidenti Serdar Berdimuhamedov bilan ham telefon orqali muloqotda ikki mamlakat o‘rtasidagi strategik sheriklik munosabatlarini yanada rivojlantirish va ko‘p qirrali hamkorlikni kengaytirish masalalari muhokama qilindi. Turkmaniston prezidenti davlat rahbarini ishonchli g‘alabasi bilan samimiy tabrikladi.
Shavkat Mirziyoyev Qozog‘iston prezidenti Qosim-Jo‘mart Toqayev bilan telefon orqali muloqot qildi. Davlat rahbari O‘zbekiston yetakchisini ishonchli g‘alabasi bilan dildan qutlab, unga yangi muvaffaqiyatlar, farovonlik va ravnaq tiladi. Muloqotda savdo-iqtisodiy hamkorlik bo‘yicha qo‘shma loyihalarni yanada ilgari surishga alohida eʼtibor qaratildi.
Shu bilan birga, birinchilardan bo‘lib, Shavkat Mirziyoyevni O‘zbekiston prezidenti saylovidagi ishonchli g‘alabasi bilan Turkmaniston Milliy yetakchisi, Xalq Maslahati raisi Gurbanguli Berdimuhamedov bilan telefon orqali tabrikladi.
O‘zbekistonda muddatidan oldin o‘tkazilgan prezidentlik saylovi
O‘zbekistonda muddatidan ilgari prezident saylovi 2023-yil 9-iyul kuni bo‘lib o‘tdi. Mamlakat bo‘ylab ochilgan 10 mingdan ortiq saylov uchastkalari soat 8:00 dan soat 20:00 ga qadar saylovchilarni qabul qildi. Markaziy saylov komissiyasi bergan ma’lumotga ko‘ra, saylovda jami ro‘yxatga olingan saylovchining 15,6 million nafari, ya’ni saylovchilarning 79,8 foizi ovoz berdi. Saylov kodeksining 96-moddasiga muvofiq, agar saylovchilar ro‘yxatiga kiritilgan fuqarolarning 33 foizi ovoz berishda ishtirok etgan bo‘lsa saylov o‘tgan hisoblanadi.
Prezident saylovining dastlabki natijalariga ko‘ra:
Ulug‘bek Inoyatov (XDP) — 4,2 foiz;
Abdushukur Hamzayev (Ekologik partiya) — 3,74 foiz;
Robaxon Mahmudova (“Adolat”) — 4,43 foiz;
Shavkat Mirziyoyev (O‘zLiDeP) — 87,05 foiz ovoz to‘plagan.
Izoh (0)