Ўзбекистон Олий суди “Тошкент металлургия заводи”(TMЗ) таъсисчиларидан Кипрда рўйхатдан ўтган, жами TMЗ акцияларининг назорат пакетига эга бўлган Metalloinvest Holding (Cyprus) Limited (41,87 фоиз) ва Miramonte Investments Limited’ни (8,23 фоиз) чиқариб ташлади. Суд қарори июнь ойи охирида кучга кирди.
Metalloinvest (USM таркибига киради, холдинг акциядорларидан бири Алишер Усмонов) ўз тузилмалари TMЗ таъсисчиларидан чиқарилишини тасдиқлади. Суд қарорига кўра, 2022 йилда “Тошкент металлургия заводи” 316,8 миллиард сўм миқдорида зарар кўрган. 2017—2022 йиллар учун тўпланган зарар эса 916,92 миллиард сўмни (79,5 миллион долларга яқин) ташкил этади. Metalloinvest ўтган йилнинг апрель ойида TMЗ капиталига кирган.
Заводнинг молиявий ҳолатини яхшилаш учун акциядорлар йиғилишини ўтказиш керак, аммо компаниялар завод фаолиятида иштирок этишдан, шу жумладан, компания иштирокчиларининг умумий йиғилишларида қатнашишдан бош тортмоқда.
АҚШ Молия вазирлигига кўра, Miramonte Investments Limited ҳам Усмоновга алоқадор. Компания ўтган йилдан бери TMЗ фаолияти билан шуғулланмайди ва унга юборилган хатлар жавобсиз қолмоқда.
Судга Ўзбекистон тикланиш ва тараққиёт жамғармаси (TMЗнинг қолган 49,9 фоизига эгалик қилади) мурожаат қилган. У суддан инвесторларни корхона фаолиятида иштирок этмаётгани сабабли таъсисчилар рўйхатидан чиқаришни сўраган.
Жамғарма миллиардер билан боғлиқ тузилмаларга қарши санкциялардан сўнг деярли 80 миллион доллар зарар ва тўланмаган кредит билан қолиб кетган, шунинг учун корхонани молиявий тиклаш учун шошилинч чоралар кўриш зарур.
Metalloinvest Holding (Cyprus) Limited ва Miramonte Investments Limited компаниялари завод активларининг назорат пакетига эгалик қилиши ва қарорлар кўпчилик овоз билан қабул қилиниши лозимлигидан келиб чиқиб, уларнинг умумий йиғилишда иштирок этмаслиги йиғилиш ўтказиш учун кворум етишмаслиги, йиғилиш кун тартиби бўйича қарор қабул қилишнинг имконсизлигига олиб келади.
“Юқоридагилардан келиб чиқиладики, жавобгарларнинг ҳаракатсизлиги молиявий тикланиш масалалари бўйича жамият учун муҳим қарорларни қабул қилишни имконсиз қилади. Бу эса ўз навбатида жамиятнинг кредиторлар олдидаги мажбуриятларини бажаришни ва жамият фаолиятини амалда имконсиз қилади”, — дейилади суд қарорида.
Metalloinvest вакилининг “ТАСС”га айтишича, компания TMZ иштирокчилари таркибидаги ўзгаришлардан хабардор.
7 июль куни Тошкент металлургия заводи компания иштирокчилари таркибидаги ўзгаришлар ишлаб чиқариш барқарорлигига ва кредиторлар олдидаги мажбуриятларни ўз вақтида бажариш имкониятига таъсир қилмаслигини ва TMЗ 2026 йилдан бошлаб “тасдиқланган режа” асосида даромад олишни режалаштираётганини маълум қилди.
Банкротликнинг олдини олиш чора-тадбирлари орасида Россиянинг International Financial Technologies XXI компаниясидан 24 ой муддатга 1,5 миллиард рубль миқдорида кредит олиш таклиф этилади. Заводнинг мулки гаровга қўйилиши кутилмоқда.
Изоҳ (0)