Польша Ички хавфсизлик агентлиги (ИXА) “Россия разведкаси учун ишлаган” яна бир тармоқ аъзосини қўлга олди. Бу ҳақда 10 июль куни Польша ички ишлар ва маъмурият вазири Мариуш Каминский маълум қилди.
Қўлга олинган шахс Украина фуқароси бўлиб, у 2019 йилдан бери Польшада яшайди.
“Гумонланувчи ҳарбий иншоотлар ва денгиз портларини кузатган”, — деди вазир.
Унинг сўзларига кўра, эркак Россиядан доимий пул олиб турган. Бу тергов доирасидаги ушланган ўн бешинчи одам, деб қўшимча қилди Каминский.
Аввалроқ, 30 июнь куни Польша миллий прокуратураси ИXА ходимлари Россия фуқароси ва “биринчи лига клуби спортчиси”ни қўлга олгани ҳақида хабар берган эди. ОАВ хабарларига кўра, гап хоккей клуби ҳақида боряпти.
Эркак уюшган жиноий гуруҳда иштирок этиш ва Польша зарарига хорижий разведка хизмати манфаатларини кўзлаб ҳаракат қилганлик моддалари бўйича айбланмоқда.
Тергов маълумотларига кўра, у, хусусан, бир нечта воеводликларда муҳим инфратузилмани ўрганиш билан шуғулланган, раҳбарларни разведка натижалари тўғрисида хабардор қилган ва бунинг учун мукофот олган. Россиялик Польшада 2021 йил октябрь ойидан бери бўлган. У ҳибсга олинган ва 10 йилгача қамоқ жазосига ҳукм қилиниши мумкин. 13 июнь куни Люблин туман суди эркакни уч ойга ҳибсга олишга қарор қилди.
Изоҳ (0)