Бўстонлиқдаги хонадонларга ўт кетди. Зоир Мирзаев воқеа жойига етиб борди (видео)

Тошкент вилоятининг Бўстонлиқ туманидаги “Қоранкўл” маҳалласида жойлашган хонадонларга ўт кетди. Тўртта хонадоннинг 2 таси буткул ёниб кулга айланган бўлса, 2 та хонадон қисман ёнган. “Дарё” журналисти уйи ёнган фуқаролар билан суҳбатлашди.

Аниқлик киритилишича, воқеа 2023 йилнинг 1 июль куни тонгги 04:00 да содир бўлган.

Ўша куни ғафлат босдими, телефоним “будилниг”и жирингласа-да, ўчириб, яна беш дақиқа ухлай дебман-да. Шундан сўнг 5 дақиқа ётдимми ёки 10-15 дақиқами билмайман, тонгги 4 лар атрофи экан ўғлим “Ойи туринг, туринг, пастдаги уйимиз ёниб кетди”, деди. Ўрнимда туриб, ҳовлига югуриб чиқсам, қўшнимиз уйидаги “пекарний”дан олов ёниб, осмонга тутун кўтарилаётган экан. Уйга югуриб кириб, набирамни излай бошладим. Кўзимга ҳеч нарса кўринмади, фақат набирамни изладим. Кейин билсам, набирамни келиним оёқяланг югуриб, кўчага олиб чиққан экан. Кўчага чиқсам, келиним набирамни олиб, у ёқдан бу ёққа югуриб, ёрдам сўраб юрибди, — дейди уйи ёниб кул бўлган Анаржон Ўсарова.

Суҳбатдошнинг айтишича, ёнғин пайтида у ва келини қўрққанидан ҳушини йўқотган.

Кўчада келиним ҳушидан кетиб қолди. Кейин мен йиқилиб тушдим. Сўнгра бир қўшнимиз келиб, ҳаммага хабар берди ва барчани ёрдамга чақирди. Қўни-қўшнимга, элимга минг раҳмат. Вилоят ҳокимига ҳам раҳмат, — дейди суҳбатдош.

Суҳбатдошнинг тахминича, олов қўшни хонадондан чиққан.

Олов қўшниникидан чиққан. Унинг “пекарний”си бор эди. Қўшним эса сенинг уйингдан чиққан деди. Менда олов чиқадиган нарса йўқ. Ёнғин бизни хонавайрон қилди”, — дейди у.

Анаржон Ўсарованинг турмуш ўртоғи Ҳасан Ўсаровнинг айтишича, ёнган уйи 8 хонали бўлган.

Эрталаб азонда ёнғин чиққач, уйдан ҳаммани кўчага олиб чопдик. Халқимиз, ўт ўчириш машиналари ёрдамга келиб, кўмак беришди. Барака топишсин, — дейди Ҳасан Ўсаров.

Тошкент вилояти ҳокими Зоир Мирзаев уйи ёнган фуқаролар билан учрашиш мақсадида Бўстонлиқ туманининг “Қоранкўл” маҳалласига борди.

Ёнғин содир бўлган куни менга туман ҳокими телефон қилиб, воқеа ҳақида айтди. Муҳими ҳеч кимга зарар етмабди. Шунисига шукр — қолгани бўлади. Ҳеч қандай муаммо бўлмайди. Янги, замонавий уйлар қуриб берилади, — деди вилоят ҳокими Зоир Мирзаев.

Вилоят раҳбарининг маълумот беришича, уйи буткул ёнган хонадон вакилларига вилоятдан 20 миллион сўм, тумандан 15 миллион сўм, жами 35 миллион сўмдан ёрдам берилган. Уйи қисман ёнган хонадон вакилларига эса 16 миллион сўмдан ёрдам пули берилган.

Аниқланишича, уйи буткул ёнган хонадон вакилларидан бирига контейнер уй берилган бўлса, яна битта хонадон вакиллари яқин қариндошларининг уйида истиқомат қилмоқда.

Ҳашар қилиб, имкон қадар ёрдам беришимиз керак. Уйни битказиб, хонадон вакиллари уйига кўчиб кириши керак. Бўлиши керак бўлган фалокат экан, майли, муҳими ҳеч кимга зарар етмабди. Бундан тушкунликка тушиш керак эмас. Ўзимиз шахсан бориб кўрайлик дедик. Бу иш шахсан назоратимда бўлади. Ҳаммамиз биргалашиб, ҳашар қилиб, замонавий уй қуриб берамиз, — деди Зоир Мирзаев хонадон вакиллари билан суҳбатлашар экан.

Бўстонлиқ тумани ҳокими Жўрабек Аҳмедовнинг қўшимча қилишича, тумандаги барча ташкилотлар ҳашарга қўшилиб, фуқароларга янги уйлар қуриш учун ёппасига ҳаракатга тушган.

Шағал, шебенни муаммосиз етказиб берамиз. Туман автойўл ташкилоти ҳам техникаси билан ёрдам беряпти. Барчасини биргалашиб қиламиз. Маиший техникаларни ҳам ўзимиз олиб берамиз, — дейди Бўстонлиқ тумани ҳокими Жўрабек Аҳмедов.

Тошкент вилояти ҳокими уйи ёнган хонадон бекаси Анаржон Ўсарованинг кўнглини кўтарар экан “Давлатимиз раҳбари қўлимизга пул бериб қўйган. Пулдан муаммо йўқ, қиламиз барчасини. Ўтган йили Бўкада 24 та хонадонни сел олиб кетганди. Барча хонадон эгаларига янги уй қуриб бердик. Ҳеч кимни муаммолари билан ёлғиз қолдирмаймиз”, — деди.