Олий суд Тошкент давлат иқтисодиёт университети талабаси, 21 ёшли У.Ж.га Telegram гуруҳда диний мазмундаги нашида тарқатгани учун 3 йилга озодликдан маҳрум қилиш жазоси тайинлангани ҳақида хабар берганди. Мазкур йигит иши бўйича лингвист мутахассис сўроқ қилинди.
Адвокат Абдуллаевнинг маълум қилишича, суд мажлисига жалб этилган лингвист мутахассисга ҳимоя томони бир неча саволлар билан мурожаат қилди. Саволларга жавобан у судга амалдаги Жиноят кодексининг 244-1-моддаси диспозициясида келтирилган “Диний экстремистик, сепаратистик ва ақидапарастлик ғоялари билан йўғрилган...” деган матндаги “ва” боғловчиси тенг боғловчиларнинг бириктирувчи турига мансуб бўлиб, у ўзидан олдин ва кейин келган сўзларни, шунингдек шу матндаги вергул тиниш белгиси билан ажратилган сўзни, яъни барча уюшиқ бўлакларни тенг мақомда ўзаро бириктиришини, бу эса аниқловчи вазифасида келган ушбу сўзлар бир пайтнинг ўзида улар изоҳлаб келган предметда, яъни материалларда жамланган бўлиш шартини ифодалашини тушунтириб берди.
“Яна ҳам тушунарли қилиб айтсак, таъқиб остига олинган материалда шу модда диспозициясида санаб ўтилган юқоридаги ҳар учала сифат — диний экстремистик, сепаратистик ҳамда ақидапарастлик ғояларининг барчаси (мажмуи) билан йўғрилганлик белгиси бўлиши шартлиги ойдинлашди.
Эслатиб ўтамиз, Ж.У.га фақатгина ақидапарастлик ғоялари билан йўғрилган материални тарқатганлик айблови илгари сурилмоқда”, дейилади хабарда.
Бундан ташқари, бир нафар мутахассис ва бир нафар эксперт сўроқ қилинди. Ҳозирча суд танаффус эълон қилиб, навбатдаги суд мажлисини 2023 йил 6 июль куни соат 15:00 га белгилади.
Изоҳ (0)