Тошкентнинг Мирзо Улуғбек туманидаги мактаб ҳовлисида дарахтлар кесиб ташлангани тўғрисида хабар берилганди. Туман ҳокимлиги матбуот хизматининг маълум қилишича, дарахтларга зиён етказган шахсга нисбатан жиноят иши қўзғатилган.
Қайд этилишича, Мирзо Улуғбек туманидаги Мактабгача ва мактаб таълими вазирлиги тасарруфидаги Мафифидум (собиқ 171-мактаб) ҳудудидаги 26 туп гледичия навли манзарали дарахт 28 май, якшанба куни фуқаро Анатолий Страшко томонидан кесилган.
Видеокузатув камерасининг кўрсатишича, фуқаро бу ишни мактабни ўраб турувчи панжарага туташ бўлган гаражлардан ошиб тушиб, амалга оширган. Оқибатда ўсимлик дунёсига 312 миллион 180 минг сўм миқдорида зарар етказилган.
Мазкур ҳолат юзасидан Мирзо Улуғбек тумани прокуратураси томонидан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан жиноят иши қўзғатилган.
Ноқонуний дарахт кесиш ҳолатлари
Бир неча кун олдин Фарғонадаги чегара пости яқинида 12 туп манзарали дарахт қўпориб ташлангани тўғрисида хабар берилганди. Ўзбекистонда 2022 йил давомида дарахт ва буталарнинг ноқонуний кесилиши ортидан табиатга 10 миллиард сўм зарар етказилган. Ўтган йилда жами 1 777 туп қимматбаҳо ва кўп йиллик дарахтлар кесилган. Вазият таҳлил этилганда, қурилиш объектлари атрофини ўраб олиш натижасида дарахтларнинг қаровсиз қолиши, шикастланиши ва нобуд бўлиш ҳолатлари содир этилаётгани аниқланган.
Изоҳ (0)