Ўзбекистон Миллий гвардияси “Миллий гвардияси Қўриқлаш бош бошқармасининг қўриқлаш-патрул хизматини ташкил этиш тўғрисида”ги ҳукумат қарори лойиҳасини муҳокамага қўйди.
Қайд этилишича, ушбу хизмат юзага келаётган криминоген ва ижтимоий вазиятга тезкор таъсир кўрсатиш, маҳаллий давлат ҳокимияти органларининг жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашиш соҳасидаги фаолиятига қўшимча куч ва воситаларни жалб этиш борасидаги ҳуқуқ ва имкониятларини кенгайтириш мақсадида ташкил этилмоқда.
Миллий гвардия Қўриқлаш бош бошқармасининг қўриқлаш-патрул хизмати давлат ва хўжалик бошқаруви органлари, маҳаллий давлат ҳокимияти органлари ҳамда бошқа ташкилотлар, тадбиркорлик субъектлари, шунингдек, жисмоний ва юридик шахслар билан ихтиёрий равишда тузилган шартномаларга асосан белгиланган ҳудудларда ташкил этилади.
Миллий гвардия манфаатдор вазирликлар ва идоралар билан биргаликда:
- Қўриқлаш бош бошқармасининг қўриқлаш-патрул хизмати томонидан кўрсатилаётган хизматларнинг тарифларини ишлаб чиқади ва тасдиқлатади;
- ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштиради.
Қўриқлаш-патрул хизматини ташкил этиш тўғрисидаги низомга кўра, Миллий гвардия Қўриқлаш бош бошқармасининг қўриқлаш-патрул хизмати фаолиятини ташкил этиш, нарядлар хизматини ташкиллаштириш ва уларнинг асосий вазифалари, функциялари, ҳуқуқлари, мажбуриятлари ҳамда жавобгарлигини тартибга солади.
Миллий гвардияга берилаётган ваколатлар
2021 йилнинг августида Ўзбекистон Миллий гвардияси ходимларига фуқароларнинг автомобилларидан мажбурий тарзда фойдаланишга рухсат берилган эди. Миллий гвардия органлари томонидан транспорт воситасидан мажбурий тарзда фойдаланилганда, транспорт воситасининг эгасига ҳарбий хизматчи (ходим) ўз идентификацияловчи ҳужжатини бериши шарт.
Шу йилнинг майида эса президент томонидан имзоланган қонун билан Маъмурий жавобгарлик тўғрисидаги кодексга ўзгартиришлар киритилди. Ҳужжат билан Миллий гвардия органлари ходимларига майда безорилик, совуқ қурол ёки совуқ қурол сифатида фойдаланилиши мумкин бўлган ашёларни олиб юриш, вояга етмаган шахсни маъмурий ҳуқуқбузарлик содир этишга, ғайриижтимоий хатти-ҳаракатларга жалб қилиш, жамоат жойларида алкогол маҳсулотларини истеъмол қилиш каби маъмурий ҳуқуқбузарликлар бўйича ишларни кўриб чиқиш, баённомалар тузиш ва уларни кўриб чиқиш учун судга юбориш бўйича қўшимча ваколатлар берилган.
Изоҳ (0)