Бухоро вилояти Ғиждувон туманидаги банк филиали кассири мижозларнинг 41 та банк карталаридаги маблағларни ўғирлагани аниқланди, деб хабар бермоқда ИИВ матбуот хизмати.
Маълум қилинишича, Бухоро вилояти Ғиждувон туманида яшовчи фуқаро пластик картасидан пуллар ўғирлангани ҳақида ИИБга мурожаат қилган. Ўтказилган тезкор-тадбирда пулларни ўғирлаган шахс Ғиждувон туманидаги банк филиали сайёр кассасининг 2002 йилда туғилган кассири экани аниқланган.
Тергов ҳаракатлари давомида аниқланишича, у 2022 йил ноябридан 2023 йил 29 май кунигача фуқароларнинг пенсия тўловлари, моддий ёрдам ва икки ёшгача нафақа пулларини олиш учун очилган 41 та пластик карталаридан жами 21,9 миллион сўм пулларни ўзлаштириб, ўзининг эҳтиёжлари учун ишлатиб юборган.
Унга нисбатан Жиноят кодексининг 169-моддаси (ўғрилик) 1-қисми билан жиноят иши қўзғатилди. Ҳозирда ўғирланган маблағларнинг барчаси қопланиб, ҳолат юзасидан тергов ҳаракатлари олиб борилмоқда.
Изоҳ (0)