Россиянинг Самара вилоятида Honda минивени ва Hyundai автомобили тўқнашиши оқибатида Ўзбекистон фуқаролари ҳалок бўлганди. Ўзбекистоннинг Қозон шаҳридаги бош консулхонаси ҳолат юзасидан маълумот берди.
Воқеа 27 июнга ўтар кечаси юз берганди. Қирғизистон Ташқи ишлар вазирлиги берган маълумотда ҳодиса оқибатида олти киши: икки нафар Қирғизистон фуқароси, тўрт нафар Ўзбекистон фуқароси ҳалок бўлгани маълум қилинганди. Бош консулхона ахборотига кўра, бахтсиз ҳодиса оқибатида 5 нафар Ўзбекистон фуқароси ҳалок бўлган, 1 нафар фуқаро оғир аҳволда “Болшеглушиская” давлат тиббиёт муассасасига етказилган.
Қайд этилишича, ҳозирда қурбонларнинг жасадларини ватанга қайтариш ишлари олиб борилмоқда. Ушбу масала бош консулхона назоратида бўлиб, Самара вилояти маъмурияти ва масъул идоралари билан доимий алоқа ўрнатилган.
Йўл ҳаракати хавфсизлиги давлат инспекцияси Самара вилояти бошқармаси берган маълумотга кўра, жами олти киши ҳалок бўлган, яна олти нафари тан жароҳатлари билан касалхонага ётқизилган.
Изоҳ (0)