Россиянинг Томск вилоятида юз берган ёнғинда уч нафар Ўзбекистон фуқароси ҳалок бўлди, деб хабар беради “Vtomske.ru”.
Маълум қилинишича, кўнгилсиз ҳодиса 15 апрель куни Асинодаги уйда содир бўлган. Ёнғинни ўчириш вақтида қутқарувчилар 2002, 1989 ҳамда 1975 йилда туғилган эркаклар жасадини топган. Ҳалок бўлганлар Ўзбекистон фуқароси бўлгани айтилмоқда.
17 апрель куни жиноятга алоқадорликда гумонланиб “Стройдоммонтаж-М”нинг 43 ёшли ишчиси қўлга олинган. Мазкур тижорий ташкилот ёлланма ишчилар, жумладан, меҳнат муҳожирларини жалб этган ҳолда қурилиш ва таъмирлаш ишлари борасида хизмат кўрсатади.
Гумонланувчи, шунингдек, биноларни ижарага бериш билан шуғулланувчи якка тартибдаги тадбиркор бўлиб, ёниб кетган уй ҳам унга тегишли.
“2023 йилда у ‘Стройдоммонтаж-М’га ишга жойлашган ўзбекистонлик меҳнат муҳожирлари гуруҳида юқоридаги уйни яшаш учун берган. Аммо уй эгаси бўла туриб, у ёнғин хавфсизлиги талабларини таъминламаган, оқибатда уч кишининг ўлимига олиб келган ёнғин юз берган”, — дейилади хабарда.
Ҳолат юзасидан Россия қонунчилиги бўйича жиноят иши қўзғатилган.
12 декабрь куни Санкт-Петербургда ўзбекистонлик ишчи 7-қаватдан қулаб ҳалок бўлганди. Январь ойида эса Қозоғистоннинг Ақмола вилоятидаги ишламаётган “Бестобе” кони ҳудудида ноқонуний олтин қазиб олувчилар ўзбекистонлик эркакнинг жасадини аниқлаган эди.
Изоҳ (0)