Россия Мудофаа вазирлигининг Telegram каналида вазирлик раҳбари Сергей Шойгунинг “Ғарбий кучлар гуруҳи тузилмаларидан бирининг фронтолди қўмондонлик пунктига” ташриф буюргани акс этган видео эълон қилинди.
“Россия ҳарбий вазирлиги раҳбари гуруҳ қўмондони, генерал-полковник Евгений Никифоровнинг ҳисоботини эшитди ва қўмондонлар билан йиғилиш ўтказди”, — дейилади Мудофаа вазирлиги хабарида.
Бу Россияда “Вагнер” хусусий ҳарбий компанияси асосчиси Евгений Пригожин томонидан уюштирилган исёндан кейин Шойгунинг жамоатчилик олдида биринчи марта кўриниши. 23 июнь куни кечқурун Пригожин Россия мудофаа вазири Сергей Шойгуни “Вагнер” лагерларига ракета ҳужуми уюштиришга рухсат беришда айблади. Шундан сўнг Пригожин “адолат маршини” бошлашга ваъда берди. Ўша кеча “Вагнер” ёлланма аскарлари Ростов-Донга кириб келишни бошлади, шундан сўнг уларнинг бир қисми Москвага жўнатилди.
“Вагнер” бўлинмалари Россия пойтахтигача етиб бормади. 24 июнь куни кечқурун Пригожин Александр Лукашенко билан музокаралардан сўнг ёлланма аскарлар “ўз колонналарини буриб, қарама-қарши йўналишда дала лагерларига жўнаб кетишини” маълум қилди. Исён пайти Шойгу на жамоат олдида кўринди, на нима бўлаётганига изоҳ берди.
Изоҳ (0)