“Вагнер” асосчиси Евгений Пригожиннинг хатти-ҳаракатлари хиёнат ва орқадан пичоқ уриш бўлди, ҳар қандай ички тартибсизликлар давлатчиликка таҳдиддир. Бу ҳақда Россия президенти Владимир Путин ўз мурожаатида гапирди.
Путин Пригожиннинг исмини тилга олмади, фақат “Вагнер” ҳақида гапирди. Путиннинг айтишича, хиёнатга “ҳаддан ташқари амбициялар ва шахсий манфаатлар” сабаб бўлган.
“Россия президенти ва Олий Бош қўмондон сифатида мен мамлакатни ҳимоя қилиш, конституциявий тузумни ҳимоя қилиш учун ҳамма нарсани қиламан. Исённи уюштирган ва сафдошларига қарши қурол кўтарган шахс жиноят содир этган ҳисобланади ва бунинг учун жавоб беради”, — деб ваъда қилди Путин.
“Ростов-Дондаги вазиятни барқарорлаштириш учун қатъий чоралар кўрилади. У ердаги ҳолат қийинлигича қолмоқда — фуқаролик ва ҳарбий ҳокимиятларнинг иши амалда блокланган”, — қўшимча қилди Путин.
Маълумот учун 23 июнь куни кечқурун Пригожин Россия мудофаа вазири Сергей Шойгуни “Вагнер” лагерларига ракета ҳужуми уюштиришга рухсат беришда айблади. Шундан сўнг Пригожин “адолат маршини” бошлашга ваъда берди, кўпчилик бу таҳдидни ҳарбий тўнтариш уюштиришга уриниш сифатида қабул қилди. Россия Федерал хавфсизлик хизмати Пригожинга қарши қуролли тўнтаришга уриниш бўйича иш очди.
24 июнга ўтар кечаси Ростов-Дон шаҳри “Вагнер” жангчилари томонидан босиб олинди. Шаҳар марказини Евгений Пригожинга бўйсунувчи қуролли шахслар эгаллади. Эрталаб Пригожин Россия Мудофаа вазирлиги ва Бош штаб раҳбарларининг ўринбосарлари билан учрашди. У Сергей Шойгу ва Валерий Герасимов “Вагнер”га топширилмагунча, ёлланма аскарлар “Ростовни тўсиб, Москвагача боришини” айтди.
Изоҳ (0)