Миср пойтахти Қоҳирада ядро қуролига эга бешта давлат (Буюк Британия, Хитой, Россия, АҚШ ва Франция) вакилларининг ишчи учрашуви ўтказилди. Бу ҳақда 23 июнь куни АҚШ Давлат департаменти маълум қилди.
Хабарга кўра, Вашингтон томонидан ташкил этилган ушбу учрашув Ядро қуролини тарқатмаслик тўғрисидаги шартнома муҳокамаси доирасида 13–14 июнь кунлари бўлиб ўтган.
“Тегишли давлатларнинг Ташқи ишлар ва Мудофаа вазирликлари экспертлари стратегик хавфларни камайтириш, шунингдек, ядровий доктриналар ва ядро сиёсатини муҳокама қилди”, — дейилади департамент хабарида.
Учрашувда АҚШдан Давлат департаменти ва Мудофаа вазирлиги, шунингдек, Миллий Ядро хавфсизлиги бошқармаси мутахассислари иштирок этган. Бошқа давлатлардан кимлар вакил бўлгани ҳақида хабар берилмаган.
“АҚШ делегацияларнинг профессионал ёндашувини маъқуллади”, — дейилади Давлат департаменти хабарида.
Қўшимча қилинишича, АҚШ президенти ушбу форматда “бундай муҳим масалаларни муҳокама қилишга кўмаклашишни давом эттиради”.
Аввалроқ АҚШ президенти Жо Байден Россия президенти Владимир Путин томонидан тактик ядровий қуролдан фойдаланиш таҳдиди “реал” эканини айтганди.
Изоҳ (0)