Misr poytaxti Qohirada yadro quroliga ega beshta davlat (Buyuk Britaniya, Xitoy, Rossiya, AQSH va Fransiya) vakillarining ishchi uchrashuvi o‘tkazildi. Bu haqda 23-iyun kuni AQSH Davlat departamenti ma’lum qildi.
Xabarga ko‘ra, Vashington tomonidan tashkil etilgan ushbu uchrashuv Yadro qurolini tarqatmaslik to‘g‘risidagi shartnoma muhokamasi doirasida 13–14-iyun kunlari bo‘lib o‘tgan.
“Tegishli davlatlarning Tashqi ishlar va Mudofaa vazirliklari ekspertlari strategik xavflarni kamaytirish, shuningdek, yadroviy doktrinalar va yadro siyosatini muhokama qildi”, — deyiladi departament xabarida.
Uchrashuvda AQSHdan Davlat departamenti va Mudofaa vazirligi, shuningdek, Milliy Yadro xavfsizligi boshqarmasi mutaxassislari ishtirok etgan. Boshqa davlatlardan kimlar vakil bo‘lgani haqida xabar berilmagan.
“AQSH delegatsiyalarning professional yondashuvini ma’qulladi”, — deyiladi Davlat departamenti xabarida.
Qo‘shimcha qilinishicha, AQSH prezidenti ushbu formatda “bunday muhim masalalarni muhokama qilishga ko‘maklashishni davom ettiradi”.
Avvalroq AQSH prezidenti Jo Bayden Rossiya prezidenti Vladimir Putin tomonidan taktik yadroviy quroldan foydalanish tahdidi “real” ekanini aytgandi.
Izoh (0)