Сурхондарёда Юқори Тўполанг ГЭС ишга тушса, 1560 та иш ўрни яратилиб, 850 мингдан ортиқ хонадон электр энергия билан таъминланади

Сурхондарё вилоятида Юқори Тўполанг ГЭС ишга туширилгач, 1560 та янги иш ўрни яратилиб, ҳудуддаги 850 мингдан ортиқ хонадон электр энергия билан таъминланади. Бу ҳақда “Ўзбекгидроэнерго” АЖ бошқаруви раиси Абдуғани Сангинов журналистлар билан мулоқотида гапириб берди.

Маълум қилинишича, “Ўзбекгидроэнерго” АЖ ташаббуси билан “Тўполанг ГЭС” унитар корхонасига ОАВ вакиллари иштирокида пресс-тур ташкил этилган.

“Сурхондарё вилоятида жами 55 та лойиҳа асосида жами қуввати 25,8 МВт бўлган лойиҳалар ишга туширилади. Шундан 2023 йилда 8 та лойиҳа асосида жами қуввати 10,1 МВт бўлган янги лойиҳалар ишга туширилиб, аҳолига электр энергия ишлаб чиқарилади. Бу борада, жамият томонидан қуввати 9,1 МВт бўлган 5 та лойиҳа ишга туширилиши, хусусий сектор томонидан янги 3та лойиҳа – қуввати 1 МВт бўлган микро ГЭСлар ишга туширилиши режа қилинган. Амалга оширилган ишлар натижасида 582 миллион м3 табиий газ иқтисод қилинишига эришилади”, — дейди Абдуғани Сангинов журналистларнинг саволларига жавоб берар экан.

Таъкидланишича, янги истиқболли лойиҳа асосида 16 МВт бўлган “Зарчоб-3” ГЭС қурилиши бўйича дастлабки ишлар амалга оширилмоқда.

“Шунингдек, истиқболли лойиҳалар асосида кейинги йилларда Тўполанг дарёсининг юқори қисмида жами 20 та лойиҳалар асосида қуввати 264 МВт бўлган Юқори Тўполанг ГЭСлари қурилади. Ушбу жараёнда эса жамият томонидан хусусий сектор томонидан амалга ошириладиган микро ГЭСларга алоҳида эътибор қаратилмоқда. Хусусан, Сурхондарё вилоятида жами 55 та лойиҳа асосида умумий қуввати 25,8 МВт бўлган лойиҳалар ишга туширилади. Шундан 2023 йилда 8 та лойиҳа асосида жами қуввати 10,1 МВт бўлган янги лойиҳалар ишга туширилиб, аҳолига тоза электр энергияси ишлаб чиқарилади. Бу борада, жамият томонидан қуввати 9,1 МВт бўлган 5 та лойиҳа ишга туширилиши, хусусий сектор томонидан янги 3 та лойиҳа – қуввати 1 МВт бўлган микро ГЭСлар ишга туширилади”, — дейди масъул.

Қўшимча қилинишича, амалга оширилган ишлар натижасида 1560 та янги иш ўринлари яратилиб, 850 000 мингдан ортиқ хонадон электр энергияси билан таъминланади.

Сурхондарёдаги Тўполанг сув омбори Сариосиё тоғларидан оқиб тушган сувларни бир жойга тўплаш натижасида вужудга келган бўлиб, аҳоли учун энг зарур манба ҳисобланади. Денов, Шўрчи, Қумқўрғон туманларидаги экинзорлар мазкур сув омбори орқали суғорилса, унинг қуйи қисмидаги ГЭСлар қуввати вилоятнинг жанубий ҳудудларини электр энергияси билан таъминлайди. Тўполанг сув омборининг сиғими 500 миллион м3 га тенг.