Халқ депутатлари Тошкент шаҳар кенгаши 20 июнь куни “Тошкент шаҳар маҳаллий бюджетининг 2023 йилдаги қўшимча манбаларини харажатларга йўналтириш тўғрисида”ги қарорни қабул қилди. Ҳужжат матни “E-qaror” ягона электрон тизимига жойлаштирилди.
Қарорда ёзилишича, Тошкент шаҳар маҳаллий бюджетининг 2023 йил давомида шаклланган қўшимча манбалари ҳисобидан бир нечта соҳага маблағ ажратилади. Хусусан, 6–9 май кунлари Сирдарё вилоятида ўтказилган III Халқаро бахшичилик санъати фестивалида Тошкент шаҳри номидан қатнашган жами 35 нафар ижодий жамоа аъзолари иштироки учун ва фестивални ўтказиш билан боғлиқ харажатларга сметага мувофиқ 475 миллион 200 минг сўм берилади.
Тошкент шаҳрининг қадимий 12 та дарвозасини тарихий кўринишлари асосида босқичма-босқич қайта тиклаш ҳамда дарвозаларга олиб борувчи йўл ва бошқа инфратузилмаларни яхшилаш, малакали эксперт ва олимларни жалб қилган ҳолда дарвозаларни тиклаш бўйича лойиҳа ва лойиҳаолди ишлари учун 638 миллион 480 минг сўм ажратилади.
Шунингдек, маблағлар ҳисобидан Тошкент метрополитенидаги 12 та бекатда (“Ўзбекистон” йўналишининг 7 та ҳамда “Юнусобод” йўналишининг 5 та) кириш-чиқиш ва ўтиш йўлларини замонавий видеокузатув мосламалари билан жиҳозлаш учун 1,8 миллиард сўм ажратилади.
Бундан ташқари, қўшимча манбалар ҳисобидан Тошкент шаҳар Чавандозлар мактабига 10 бош от ва спорт анжомлари, техник жиҳозлар харид қилинади. Ободонлаштириш бошқармасига йўлларни таъмирлаш ишларида зарур бўлган махсус техника ва механизмларни харид қилиш учун 5 миллиард 641 миллион 200 минг сўм ажратилади.
Изоҳ (0)