Германия Федерал статистика бошқармаси маълумотларига кўра, 2022 йил охирига келиб Германияда аҳоли сони 84,4 миллион кишини ташкил қилган.
Ўтган йил давомида аҳоли сони 1,122 миллион кишига (1,3 фоизга) ўсди. Таққослаш учун: 2021 йилда Германияда аҳоли сони 82 минг кишига (0,1 фоизга) ошган.
Аҳоли сони кўпайишининг асосий сабаби сифатида иммиграция кўрсатилмоқда. Ўтган йили соф иммиграция (мамлакатга келган ва чиқиб кетганлар ўртасидаги фарқ) 1,455 миллион кишини ташкил этди. Яна таққослаш учун: 2021 йилда соф иммиграция 329 минг кишини ташкил қилган.
Бунга, биринчи навбатда, Украинадан келган қочқинлар оқими сабаб бўлган, дейилади Федерал статистика бошқармаси хабарида.
Аввалги йиллардаги каби 2022 йилда ҳам Германияда вафот этганлар сони туғилганларникидан кўпроқ бўлди.
Мамлакатда ўлимлар сони қарийб 20 йил давомида ўсиб бормоқда.
Изоҳ (0)