Урушни ўрганиш бўйича Америка таҳлилий институти (ISW) Украинадаги ҳарбий ҳаракатларнинг кунлик хулосасини тақдим этди. Унда экспертлар Украина қуролли кучлари ўз тактикасини қайта кўриб чиқиш учун ҳужум операцияларини вақтинча тўхтатиши мумкинлигини тахмин қилмоқда.
ISW маълумотларига кўра, 16 июнь куни Эстония ҳарбий разведкаси раҳбари Марго Гросберг яқин етти кун ичида Украина томони қарши ҳужум фаоллигини камайтириши мумкинлигини айтди. Унинг сўзларига кўра, украиналиклар ўз операцияларига “эҳтиёткорлик ва хотиржамлик билан” ёндашмоқда, чунки улар учун ҳам инсоний, ҳам техник ресурслар “олтинга тенг”.
Институтнинг таъкидлашича, қарши ҳужумнинг тўхтатилиши ҳақида 17 июндаги The Wall Street Journal нашрида ҳам эслатиб ўтилган. Материалга кўра, Украина қўмондонлиги “Россия позицияларини катта йўқотишларсиз ёриб ўтишнинг усулларини” таҳлил қилиш учун қарши ҳужум ҳаракатларини тўхтатишга қарор қилган.
ISW таъкидлашича, Украина армияси ўз захираларининг асосий қисмини ҳали жангга жалб қилмаган.
“Оператив паузалар йирик ҳужумларда тез-тез учрайдиган ҳодисадир ва бу пауза Украина қарши ҳужумининг тугашини англатмайди”, — деб қўшимча қилди ISW.
Изоҳ (0)