19 июнь куни Украина давлат бюджети Жаҳон банкидан 63 миллион евро миқдорида маблағ олди, деб хабар бермоқда “UNIAN”.
Украина Молия вазирлиги матбуот хизмати хабарига кўра, маблағлар Халқаро тараққиёт ассоциацияси томонидан Жаҳон банкининг “Украинада барқарор давлат бошқаруви учун давлат харажатларини қўллаб-қувватлаш” (PEACE) лойиҳаси доирасида имтиёзли шартлар билан тақдим этилган.
“Маблағлар 2023 йилнинг февраль ва март ойлари учун давлат органлари ходимлари ва ўқитувчилар меҳнатига ҳақ тўлашни таъминлаш учун давлат бюджети харажатларини қисман қоплашга йўналтирилади”, — дейилади хабарда.
Қайд этилишича, кредитни тўлаш муддати 4 йиллик имтиёзли давр билан 10 йил.
Украина учун молиявий ёрдам – тафсилотлар
31 май куни Украина Жаҳон банкининг кўп донорлик траст фонди орқали 1,25 миллиард доллар грант маблағларини олганди. Пул болали оилаларга давлат ижтимоий нафақалари тўлаш, таълим ходимларига иш ҳақи, тиббий кафолат дастури бўйича тиббий хизмат кўрсатувчиларга ҳақ тўлаш ва ҳоказоларга йўналтирилди.
Май ойи бошида Украина Жаҳон банкидан яна иккита кредит олган — давлат бюджетининг устувор ижтимоий харажатлари учун 189 миллион евро ва давлатнинг озиқ-овқат хавфсизлигини қўллаб-қувватлаш учун 132 миллион доллар.
Изоҳ (0)