Қатар ва Бирлашган Араб Амирликлари дипломатик муносабатларни тиклашга келишиб олди, икки давлат элчихоналари ва консулхоналари 19 июнь, душанбадан иш бошлайди. Бу ҳақда Қатар Ташқи ишлар вазирлиги Twitter’даги саҳифасида маълум қилди.
“Икки давлатнинг ўзаро муносабатларни мустаҳкамлаш бўйича келишуви ва мажбуриятларидан келиб чиқиб, Қатар ва БАА 2023 йил 19 июнь, душанба куни Қатарнинг Абу-Дабидаги элчихонаси ва Дубайдаги консулхонаси, шунингдек, Доҳадаги БАА элчихонаси қайта очилиши билан дипломатик муносабатлар тиклангани ҳақида эълон қилади”, — дейилади хабарда.
Вазирликнинг таъкидлашича, “бу қадам икки давлат раҳбариятининг иродасини акс эттиради ва қардош халқларнинг орзу-умидларини рўёбга чиқариш йўлида қўшма фаолиятни кучайтиришдан иборат бўлади”.
2017 йил июнь ойида БАА Баҳрайн, Миср, Ливия ва Яман билан биргаликда Қатарни мамлакатни беқарорлаштиришда ва экстремистик мафкурани, шунингдек, минтақада фаолият юритаётган гуруҳларни қўллаб-қувватлашда айблаб, у билан дипломатик алоқаларни узган эди. Доҳа бу айбловларни асоссиз деб атади.
Эслатиб ўтамиз, Саудия Арабистони, Баҳрайн, Қатар, Кувайт, Уммон ва БАА ташқи ишлар вазирликлари раҳбарлари Сурияни ҳам Араб давлатлари лигасига қайтариш бўйича маслаҳатлашувларни бошлаган. Йиғилиш иштирокчилари мамлакатни “араблар бағрига” қайтишга чақирган.
Изоҳ (0)