Америка Қўшма Штатлари Тайван мустақиллигини қўллаб-қувватламайди ва унинг Хитой билан барча келишмовчиликлари тинч йўл билан ҳал қилинишига умид қилади. Бу ҳақида айни пайтда Хитойда бўлиб турган АҚШ Давлат котиби Энтони Блинкен маълум қилди.
“Биз Тайван мустақиллигини қўллаб-қувватламаймиз ва барча келишмовчиликлар тинч йўл билан ҳал қилинишини кутамиз”, — деди у АҚШнинг Хитойга нисбатан сиёсатининг асосий тамойиллари ҳақидаги нутқида.
Шу билан бирга, Блинкен Қўшма Штатлар статус-квонинг бир томонлама ўзгаришига қарши эканлигини ва Тайванга етарли даражада мудофаа қобилиятини сақлаб қолишга ёрдам беришда давом этишини қўшимча қилди.
АҚШ Давлат котиби Энтони Блинкен 18 июнь якшанба куни Пекинга келганди. Бугун у Хитой етакчиси Си Цзиньпин билан учрашди.
Энтони Блинкеннинг ташрифи АҚШ президенти Жо Байден ва Хитой раҳбари Си Цзиньпин ўртасидаги учрашувларга замин яратиши кутилмоқда. Аввалроқ Байден яқин ойларда Си билан учрашишга умид қилаётганини айтган.
Изоҳ (0)