Украина президенти Владимир Зеленский NBC телеканалига берган интервьюсида АҚШ собиқ президенти Дональд Трампнинг Оқ уйга қайтган тақдирда, Украинадаги урушни 24 соат ичида тўхтатиш ҳақидаги ваъдаларига ишонмаслигини айтди.
Трамп агар у президентликка қайта сайланса, Украинадаги можарони 24 соат ичида тугатишга тайёрлигини бир неча бор таъкидлаган.
“Агар мен президент бўлганимда, Россия—Украина уруши ҳеч қачон юз бермаган бўларди, лекин ҳозир ҳам президент бўлсам, 24 соат ичида бу даҳшатли урушни тугатиш бўйича музокарага эришардим”, — деганди у январь ойидаги баёнотида.
Зеленский сиёсатчининг фикрига қўшилмади. NBC мухбири Трампнинг можарони тезда ҳал қила олиши ҳақидаги саволига Зеленский савол билан жавоб берди: “Нега у шуни аввалроқ қилмаган?”.
Шундан сўнг у Трамп урушни тўхтата олишига ишонмаслигини айтди. Украина президентининг фикрича, дунёда “шунчаки Путин билан гаплаша оладиган” ва жанговар ҳаракатларга чек қўядиган одамлар йўқ.
Бундан ташқари, Зеленский республикачиларнинг Киевга ҳарбий ёрдамни қисқартириш эҳтимоли ҳақидаги позициясини танқид қилди. Унинг сўзларига кўра, бундай суҳбатлар “Украина учун катта хавф”, аммо бу ҳеч қачон амалга ошмайди.
Трамп ўтган йилнинг кузида 2024 йилда президентликка номзодини қўйиш ниятини маълум қилганди. Ғалаба қозонган тақдирда у Украинадаги можарони ҳатто, “инаугурациядан олдин” ҳал қилишга ваъда берди. У бир неча бор Москва ва Киев ўртасида тинчлик музокаралари зарурлигини таъкидлаган. Бундан ташқари, сиёсатчи АҚШнинг амалдаги президенти Жо Байденнинг Украинага нисбатан қадамларини танқид қилиб келади: “У тизимли равишда, лекин, эҳтимол, онгсиз равишда бизни учинчи жаҳон урушига олиб бормоқда”.
Изоҳ (0)