Яқинда Россия ва Украинага ташриф буюрадиган бир қанча Африка давлатлари раҳбарлари Москва ва Киев ўртасида ўт очишни тўхтатиш учун “ишонч чоралари” ишлаб чиқди. Бу ҳақда ҳужжат лойиҳаси билан танишган Reuters агентлиги хабар берди.
Африка давлатлари таклиф қилмоқчи бўлган чоралар орасида Россия қўшинларини Украина ҳудудидан олиб чиқиб кетиш, Беларусь ҳудудида тактик ядро қуролини жойлаштирмаслик, шунингдек, Халқаро жиноий суднинг Владимир Путинни ҳибсга олиш тўғрисидаги ордерини тўхтатиб туриш ва санкцияларни юмшатиш кабилар бор.
Reuters хабарига кўра, 16 июнь куни Жанубий Африка Республикаси, Комор ороллари, Миср, Сенегал, Замбия, Уганда ва Конго Республикаси раҳбарлари Киевга ташриф буюриб, Украина президенти Владимир Зеленский билан учрашади. Эртаси куни улар Россия президенти Владимир Путин билан музокара олиб бориш учун Москвага боради.
Ҳужжатда таъкидланишича, юқоридаги чора-тадбирлар “томонларга ишончни мустаҳкамлаш ва тинчликни тиклаш бўйича ўз стратегияларини ишлаб чиқишга имконини берадиган ҳамда ўт очишни тўхтатиш учун қулай шарт-шароитлар яратишга қаратилган бўлиши керак”.
Ҳужжат лойиҳасида, шунингдек, ўт очишни тўхтатиш бўйича келишув Россия ва Ғарб ўртасидаги музокаралар билан мустаҳкамланиши кераклиги қайд этилган.
Май ойи ўрталарида ЖАР президенти Сирил Рамафоса Путин ва Зеленский Россия—Украина можаросини ҳал қилиш бўйича потенсиал тинчлик режасини муҳокама қилиш учун Африка етакчилари миссиясини қабул қилишга келишиб олганини айтганди.
Изоҳ (0)