Қозоғистоннинг Ўзбекистон билан чегарасида турнақатор навбат юзага келди

Қозоғистоннинг Россия, Қирғизистон ва Ўзбекистон билан чегарасида турнақатор навбат юзага келди. Бу ҳақда “Орда.кз” хабар берди.

Маълум қилинишича, чегаранинг айрим участкасида одамлар ва автомашиналар тўпланиб қолган. Қозоғистон миллий хавфсизлик қўмитаси бунинг сабабини келтириб ўтди.

• тирбандлик кузатилган йўналишлар бўйича назорат ўтказиш пунктларини қисман реконструкция қилиш;
• мева ва сабзавотларни ташиш даврида Қозоғистонга кирувчи транспортнинг кўпайиши;
• транспорт ташкилотларининг транзит салоҳиятини ошириш;
• сайёҳлик мавсумида йўловчилар оқимининг анъанавий ўсиши.

Айни пайтда Қозоғистон Республикаси Миллий хавфсизлик қўмитаси чегара хизмати назорат-ўтказиш пунктлари кеча-ю кундуз ишлаётганини таъкидлади.

“Транспорт воситаларини кўрикдан ўтказиш ва чегарадан ўтаётган шахсларнинг ҳужжатларини текширишнинг замонавий ва автоматлаштирилган тизимларини қўллаш орқали одамлар ва транспорт воситаларининг тўпланишини камайтириш чоралари кўрилмоқда”, — дейилади баёнотда.