Бишкек ва Душанбе икки давлат чегаралари яқинида дрон учирмайди. Бу ҳақда Қирғизистон президентининг Боткендаги ваколатли вакили матбуот хизматига таяниб, “24.kg” хабар берди.
Қирғизистоннинг Боткен вилояти раҳбари Абдикарим Алимбаев ва унинг тожикистонлик ҳамкасби Ражаббой Аҳмадзода шу масалани муҳокама қилган.
Томонлар чегара зонаси яқинида провокацион ҳаракатларга йўл қўймаслик, сув ресурсларидан мақсадли фойдаланиш ва икки давлат чегарасида тинчликни сақлашга келишиб олган.
Чегара ҳудудда дронларнинг парвозини тақиқлаш бўйича дастлабки келишув 2022 йил март ойида Қирғизистон—Тожикистон комиссияси томонидан кўриб чиқилган эди.
Аввалроқ Қирғизистоннинг чегарага яқин аҳолисига ватан ҳимояси учун қурол ишлатишга рухсат берилиши ҳақида маълум қилинганди. 2022 йилнинг сентябрь ойида қирғиз-тожик чегарасида юз берган сўнгги қуролли тўқнашувдан сўнг Қирғизистоннинг чегарадош туманлари аҳолисини қуроллантириш масаласи яна кўтарилган.
Изоҳ (0)