АҚШ собиқ вице-президенти, республикачи Майк Пенс агар президентликка сайланса, Россия агрессиясини қайтаришда Украинага ҳарбий ёрдам беришда давом этишини айтди. “Украинадаги одамларга курашиш имкониятини беришимиз керак”, — деди у 7 июнь куни Американинг CNN телекомпанияси эфирида фуқароларга берган интервьюсида.
Шу билан бирга, Пенс ўзининг собиқ раҳбари, АҚШ собиқ президенти Дональд Трампнинг фикрига қўшилмаслигини билдирди. Трамп Россиянинг Украинага бостириб киришини изоҳлаш давомида, Россия президенти Владимир Путинни “даҳо” деб атаганди.
“Мен даҳо ва ҳарбий жиноятчини фарқлай оламан ва Украинадаги урушда ким ғалаба қозониши кераклигини ҳам биламан — Украинада ўз озодлиги ва миллий суверенитетини тиклаш учун курашаётган одамлар”, — деди Пенс.
Аввалроқ Майк Пенс Республикачилар партиясидан АҚШ президентлигига номзодини қўйишини расман эълон қилганди. Худди шу партиядан Дональд Трамп ҳам президентликка қайта сайланишга интилмоқда. Пенс 2017 йилдан 2021 йилгача Трампнинг Оқ уйдаги ўринбосари лавозимида ишлаган, бироқ ҳозир уларнинг муносабатлари совуқлашган.
АҚШда президентлик сайлови 2024 йил 5 ноябрга белгиланган. Республикачилар партиясидан энг юқори давлат лавозимига айнан ким номзод бўлиши ички партиявий сайловларда ҳал қилинади. Трамп ҳозирда рақибларидан анча олдинда, бироқ сайлов олдидан кўп нарса ўзгариши мумкин, дея қайд этмоқда ОАВ.
Изоҳ (0)