Ўзларини ҳалок бўлган ўрмончиларнинг қариндошлари деб таништирган бир гуруҳ шахслар Қозоғистон президенти Қосим-Жўмарт Тўқаев билан нотаниш шахслар учрашганини маълум қилди. Бу ҳақда “KazTAG” хабар берди.
“Телеканаллар қаерда? Ҳамма қаерда? Кеча ҳоким ўринбосари Дмитрий Гариков ҳал қиламиз деганди. Кимдир ҳеч бўлмаса таъзия билдиргани келдими? Йўқ, келмади. Ўрмон хўжалигидан ҳам келишмади. Улар фақат қўнғироқ қилишмоқда.
Бизга уларнинг қўнғироғи нега керак? Кеча қариндошлар президент билан учрашгани борган. Бироқ биздан ҳеч ким учрашувда иштирок этмади. Бориб, бу ўз отам, дедим, ичкарига киритишмади. Уларнинг айтишича, 14 киши учрашувда бўлган. Биз уларнинг ҳеч бирини танимаймиз”, — дейди одамлар.
Абай вилояти ҳокимлиги матбуот хизмати ушбу маълумотга ҳали муносабат билдирмади.
Қозоғистондаги ўрмон ёнғини
Республиканинг Россия билан чегарадош Абай вилоятидаги ўрмон ёнғинлари 8 июнь куни бошланган. Ёнғин майдони 60 минг гектардан ошган. Ушбу ёнғин оқибатида жами 14 киши ҳалок бўлди, улар хотирасига 12 июнь куни Қозоғистонда умуммиллий мотам куни деб эълон қилинди.
Қозоғистон президенти бўлиб ўтган воқеа учун қурбонларнинг оиласидан узр сўради ва айбдорлар жавобгарликка тортилишини айтди. У қурбонларнинг оиласига моддий ёрдам кўрсатилишини билдирди.
Изоҳ (0)