Германия Бундестагининг Бюджет қўмитаси баллистик ракеталарни атмосферадан ташқарида ҳам тутиб олишга мўлжалланган Исроилнинг “Хец”-3 ракетага қарши комплексларини (у Аrrоw-3 номи билан ҳам танилган) сотиб олиш учун 560 миллион евро миқдоридаги биринчи транш ажратилишини маъқуллади.
Politico нашрининг ёзишича, Israel Aircraft Industries ва American Boeing ҳамкорлигида ишлаб чиқарилган “Хец-3” комплексига Германия сарфлайдиган умумий харажатлар 4 миллиард еврога етиши мумкин.
Бундан ташқари, Бюджет қўмитаси Германиянинг ўзида ишлаб чиқарилган яна олтита IRIS-Т SLМ зенит-ракета комплексларини сотиб олишни маъқуллади. IRIS-Т SLМ, бошқа функциялари қатори, қанотли ракеталарни тутиб олиш учун мўлжалланган. Уларнинг олтитаси учун тахминан 950 миллион евро сарфлаш режалаштирилган.
Депутат Карстен Кляйннинг нашрга айтишича, SLМ IRIS-Т ва “Хец-3” ни харид қилиш “Германия устидан ҳимоя соябонини яратишга” ёрдам беради.
14 июнь куни Германия ҳукумати тарихда илк бор Миллий хавфсизлик стратегиясини тақдим этди. Бу борадаги ишлар 2021 йилда бошланган, бироқ Россия қўшинларининг Украинага кенг кўламли босқини бошланганидан кейин у сезиларли даражада тезлашган. Стратегияда, жумладан, Германия ўз мудофаа харажатларини ялпи ички маҳсулотнинг 2 фоизигача ошириши айтилган.
Изоҳ (0)