Саудия Арабистони Миллий банки раҳбари Credit Suisse’га янги сармоя киритишдан бош тортгани учун истеъфога чиқди

Саудия Арабистонининг энг йирик банки Саудия Миллий банки раиси Аммар ал-Худайрий ўз сўзлари Швейцариянинг Credit Suisse банки акциялари нархининг кескин тушиб кетишига сабаб бўлганидан сўнг истеъфога чиқмоқда. Бу ҳақда банк баёнотига таяниб Bloomberg хабар бермоқда. 

Саудия Миллий банки Credit Suisse’нинг энг йирик акциядорларидан бири ҳисобланади.

Bloomberg агентлигига кўра, Саудия Миллий банки раҳбари лавозимини банк бош ижрочи директори Саид Муҳаммад ал-Ғамди эгаллайди.

13 март куни Credit Suisse молиявий ҳисоботларида “моддий камчиликлар” аниқланганини айтди. 

Аммар ал-Худайрий Саудия Миллий банки тартибга солувчи талаблар туфайли банкка янги сармоя киритишдан бош тортган эди. Натижада 15 март куни банк акциялари 30 фоизга арзонлашди.

19 март куни Швейцария Миллий банки мамлакатдаги икки йирик банк — UBS ва Credit Suisse бирлашиши ҳақида эълон қилди. 

UBS Credit Suisse акцияларини ҳар бири 0,5 франкка сотиб олади. Битимнинг умумий қиймати 2 млрд доллардан ошади.