Эквадор ҳукумати Бабаоё шаҳридаги Мартин Икас касалхонасида шифокорлар томонидан ўлган, деб айтилган кекса аёл дафн маросимига тайёргарлик вақтида нафас олишни бошлагани воқеасини тергов қилмоқда.
The Guardian нашрининг Эквадор Соғлиқни сақлаш вазирлигига таяниб ёзишича, 76 ёшли Белла Монтоя 9 июнь куни инсульт ва юрак тўхтаб қолиши гумони билан касалхонага ётқизилган. Шифокорлар аёлга ёрдам беришга уринган, бироқ у жонлантириш чораларига реакция билдирмаган. Натижада навбатчи шифокор унинг ўлганини маълум қилган.
Шу куни аёлнинг оиласи унинг жасадини дафн маросимига олиб кетган.
“У ерда 20 киши эдик. Тахминан беш соатдан кейин тобутдан товуш эшитилди. Биз яқин бориб, унинг зўрға нафас олаётганини кўрдик”, — деди аёлнинг ўғли Жилберто Барбера Associated Press’га.
Шундан сўнг Белла Монтоя аввал уни ўлдига чиқаришган касалхонага олиб кетилган. У реанимация бўлимига ётқизилган, ҳозирда шифокорлар назоратида.
“Онам сунъий нафас олиш аппаратига уланган, юрак уриши барқарор. Доктор унинг қўлини чимчиганда, у жавоб берди. Айтишларича, бу яхши аломат”, — деди Барбера.
Эквадор Соғлиқни сақлаш вазирлиги ҳодисани текшириш учун махсус қўмита тузди. Белла Монтоянинг қариндошлари тиббий хатолик юзасидан прокуратурага ариза ёзмоқчи.
Изоҳ (0)