АҚШ Адлия вазирлиги Credit Suisse инвестицион банкини америкалик мижозларига Ички даромад хизматидан (IRS) даромадларини яширишга ёрдам берганликда гумон қилмоқда. Бу ҳақда Bloomberg хабар бермоқда.
2014 йилда худди шундай айбловлар бўйича банк АҚШ расмийлари томонидан 2,6 миллиард доллар жаримага тортилган эди.
Бироқ ҳозирда расмийлар Швейцария банки мижозларга, хусусан, Жанубий Америкадан ноқонуний хизматлар кўрсатаётгани ҳақида янги маълумотларга эга.
Суд ҳужжатлари билан таниш манбаларга кўра, Credit Suisse ҳисоби эгалари томонидан декларация қилинмаган юзлаб миллион долларлар мавжуд.
Банкнинг ўзи барча айбловларни рад этиб, тергов билан тўлиқ ҳамкорлик қилаётганини таъкидлади.
Credit Suisse солиқ тўлашдан бўйин товлашга тоқат қилмайди. 2014 йилдан бошлаб биз солиқ органларидан активларни яшириш билан боғлиқ барча нарсаларни бартараф этиш бўйича ишимизни сезиларли даражада яхшиладик. Қонунбузарлик аниқланганда декларация қилинмаган ҳисобларни ёпиш ва банк сиёсатига риоя қилмаган ҳар қандай ходимни интизомий жазога тортиш бизнинг аниқ сиёсатимиздир, — дейилади банк баёнотида.
Аввалроқ Credit Suisse инвестицион банки тарихдаги энг оғир даврни бошдан кечираётгани, алоҳида компанияга айланиш учун инвесторларни қидираётгани ҳақида хабар берилган эди.
Изоҳ (0)